Ndërlidhjet

Zyrtarë të lartë nga Qeveria e Serbisë dhe një numër i konsiderueshëm i qytetarëve kanë qëndruar sot në Patrikanën e Pejës, me rastin e një ceremonie fetare.

Hyrjen dhe qëndrimin e zyrtarëve serbë në ceremoninë kishtare e kanë konfirmuar fillimisht zyrtarët e Policisë së Kosovës, të cilët kanë bërë sigurimin e udhëtimit të tyre nga kufiri i Kosovës me Malin e Zi deri në Pejë.

Edhe përfaqësuesit e Qeverisë së Kosovës kanë deklaruar se për disa zyrtarë të lartë të Qeverisë së Serbisë, të cilët kanë qëndruar në Kosovë, është dhënë leja e qëndrimit nga ana e autoriteteve të vendit.
Leje për të qëndruar në Kosovë kanë marrë: Ivica Daçiq dhe Goran Bogdanoviq.

Ministri i Punëve të Brendshme, Bajram Rexhepi, ka përmendur disa zyrtarë, që kanë marrë leje për të qëndruar në Kosovë.

“Leje për të qëndruar në Kosovë kanë marrë: Ivica Daçiq dhe Goran Bogdanoviq. Atyre u është lejuar të hyjnë në Kosovë”, ka thënë Rexhapi.

Në një përgjigje përmes postës elektronike, Zyra e Përfaqësuesit Special të Bashkimit Evropian në Kosovë ka thënë se “ekziston një procedurë për hyrjen e zyrtarëve serbë në Kosovë”.

“Mund të pyesni Qeverinë e Kosovës nëse kanë marrë një kërkesë të tillë", thuhet në deklaratën dhënë Radios Evropa e Lirë.

Siç mësohet, në ceremoninë fetare me rastin e inaugurimit të vikarit të ri të patriarkut të Kishës Ortodokse Serbe, kanë marrë pjesë zëvendëskryeministri i Serbisë, Ivica Daçiq, presidenti i Republikës Serbe të Bosnjës, Millorad Dodik, dhe ministri serb për Kosovën, Goran Bogdanoviq.

Qeveria e Kosovës
Zëvendëskryeministri i Kosovës, Hajredin Kuçi, citohet të ketë thënë se “Qeveria i ka dhënë leje vetëm Daçiqit dhe Bogdanoviqit, por jo edhe Dodikut”.

Zyrtari për informim i Policisë së Kosovës në Komunën e Pejës, Zeqir Kelmendi, i ka thënë Radios Evropa e Lirë se rreth 800 deri në 1,000 veta kanë hyrë në Kosovë, paraditen e sotme.

“Ne i kemi përcjellë prej pikës kufitare të Malit të Zi deri në Patrikanë dhe do t’i përcjllim edhe anasjelltas. Jemi duke u kujdesur për sigurinë e tyre”, është shprehur Kelmendi.

Përfaqësuesit e Lëvizjes Vetëvendosje kanë kritikuar lejimin e hyrjes së zyrtarëve të lartë serbë në territorin e Kosovës.

Xhelal Sfeqla, anëtar i kësaj lëvizjeje, ka thënë se Qeveria e Kosovës, në krahasim me qytetarët e saj, “me Serbinë po tregohet shumë e kujdesshme”.

“Qeveria e Kosovës ka dy kute sa i takon edhe zbatimit të ligjit në Kosovë, por edhe sa i takon të drejtës së qytetarëve të Kosovës për vullnetin e tyre politik. Përderisa ndaj aktivistëve të Lëvizjes Vetëvendosje, me mekanizmat e saj, me urdhrat e saj, është jashtëzakonisht brutale, me Serbinë ajo është jashtëzakonisht e butë”, ka thënë Sfeqla.

Kohë më parë, vetë kryeministri i Kosovës, Hashim Thaçi, pat ndaluar hyrjen pa leje të cilitdo zyrtar serb në Kosovë.

Ai për këtë çështje i pat dërguar një letër shefit të Zyrës Civile Ndërkombëtare, Piter Feith, duke thënë se “liderët serbë që vizitojnë Kosovën, nuk janë njerëz të fjalës”.

Mendimi juaj

Trego komentet

XS
SM
MD
LG