Ndërlidhjet

Afro 100% e serbëve i thonë “jo” Prishtinës


Në fshatin Grabovc, 14 shkurt 2012.
Në fshatin Grabovc, 14 shkurt 2012.
Në veri të Kosovës ka përfunduar referendumi i organizuar nga serbët lokalë. Sipas rezultateve preliminare, 99.74 për qind e qytetarëve serbë u kanë thënë “jo” institucioneve të Prishtinës në pjesën veriore të vendit, raportojnë mediat serbe.

Shtrirjen e autoritetit të Kosovës në veri të lumit Ibër thuhet ta kenë përkrahur 69 votues, përkatësisht 0.26 për qind e tyre.

Në 82 vendvotime raportohet të kenë votuar 75.28 për qind e qytetarëve, ndërsa rezultatet përfundimtare pritet të bëhen publike të dielën.

Me organizimin e referendumit në Mitrovicë, Zubin Potok, Zveçan dhe Leposaviq, serbët lokalë kanë thënë se duan të qartësojnë “vullnetin e komunitetit të tyre për lejimin apo moslejimin e shtrirjes së autoritetit shtetëror të Kosovës në veri të vendit”.

Ky organizim është kundërshtuar si nga autoritetet kosovare, ashtu edhe ato ndërkombëtare. Një ditë më parë, Kuvendi i Kosovës ka miratuar deklaratën që e shpall të paligjshëm dhe jokushtetues referendumin e ashtuquajtur të veriut.

Megjithatë, serbët lokalë kanë shfaqur shpresën se komuniteti ndërkombëtar do të respektojë qëndrimin e tyre.

“Ky referendum, ashtu siç thuhet edhe në Beograd, nuk do të ketë pasoja ligjore, sepse ne po deklarohemi për atë që shkruan në Kushtetutën e Serbisë dhe ajo është: Kosova është pjesë përbërëse e Serbisë. Presim që pas referendumit të ketë më pak presion të bashkësisë ndërkombëtare në veri”, ka thënë për mediat serbe kryetari ilegjitim i Mitrovicës, Kërstimir Pantiq.

Kundër referendumit është shprehur zyrtarisht edhe Qeveria e Serbisë. Ajo u ka bërë disa herë thirrje përfaqësuesve serbë të veriut që të heqin dorë nga ky organizim.

Presidenti i Serbisë, Boris Tadiq, ka thënë se referendumi është i dëmshëm kur janë në pyetje interesat e shtetit serb. Sipas tij, ai nuk i kontribuon as dialogut ndërmjet Prishtinës dhe Beogradit.

Megjithatë, analistët kosovarë kanë shprehur bindjen se referendumi i veriut e gëzon mbështetjen e plotë të ekzekutivit të Serbisë.

Kjo e fundit kërkon marrjen e statusit të kandidatit për anëtarësim në Bashkimin Evropian, por Brukseli i ka vënë kusht normalizimin e marrëdhënieve me Kosovën.

Referendumi në Mitrovicë, Zveçan dhe Zubin Potok, është zhvilluar të martën dhe të mërkurën, ndërsa, për dallim prej tyre, në Leposaviq është votuar vetëm një ditë.
XS
SM
MD
LG