Ndërlidhjet

Kosovë - Kriteret për vizat brenda dy muajve


Pasaporta e Kosovës
Përfaqësuesit e Qeverisë së Kosovës kanë shprehur gatishmërinë që të punojnë intensivisht në përmbushjen e kritereve të udhërrëfyesit për liberalizimin e vizave.

Në një takim takimin me kryetarët e komunave të Republikës së Kosovës për procesin e liberalizimit të vizave është theksuar se deri më 15 shtator të këtij viti, institucionet e Kosovës do të përgatisin raportin e gatishmërisë, raport ky i cili t’i dorëzohet Komisionit Evropian.

Ministrja e Integrimeve Evropiane Vlora Çitaku tha se ky dokument duhet t’i ofrojë KE-së informata të hollësishme të gjendjes aktuale të legjislacionit, institucioneve përgjegjëse, kapaciteteve njerëzore, të dhënave dhe statistikave tjera për katër blloqet e procesit të liberalizimit.

Nga ne kërkohet që deri më 15 shtator të dorëzojmë te Komisioni Evropian raportin e gatishmërisë. Kjo datë nuk është larg, janë më pak se dy muaj dhe kjo tregon se sa intensivisht duhet të punojmë ne, në përmbushjen e detyrimeve tona”, theksoi Çitaku.

Sa i përket planit të veprimit për zbatimin e udhërrëfyesit për liberalizmin e vizave, Kosova ka një plan aktual, por sipas ministres Çitaku, ky plan do të rifreskohet më së largu deri në shtator.



Ministrja Çitaku ka theksuar se plani i ri do të përmbajë veprime konkrete të afatizuara dhe të ndara sipas institucioneve përgjegjëse.

Roli i komunave në këtë drejtim do të mbetet shumë i rëndësishëm, sidomos në ri-integrimin e personave të riatdhesuar. I gjithë procesi do të menaxhohet përmes takime të nivelit të lartë që do të mbahen ndërmjet Kosovës dhe Komisionit Evropian. Gjithashtu në të ardhmen nuk presim një mision vlerësues siç e kemi pasur vitin e kaluar, por më shumë misione vlerësuese nga ekspertë të KE-së dhe shteteve anëtare të BE-së”, theksoi Çitaku.

Qeveria e Kosovës, po ashtu të mërkurën ka marrë vendim për themelimin e strukturave institucionale për koordinimin e zbatimit të udhërrëfyesit për liberalizmin e vizave.

Sekretariatin e liberalizimit të vizave do të përbëjnë Ministria e Integrimeve Evropiane dhe Ministria e Punëve të Brendshme.

Ministri i Punëve të Brendshme, Bajram Rexhepi, ka folur për disa nga kriteret e liberalizmit të vizave. Ai është fokusuar në sigurinë e dokumenteve, menaxhimin e integruar të kufijve dhe migracionit.

Rexhepi ka kërkuar nga kryetarët e komunave që të bëjnë një punë të mirë dhe intensive në përmbushjen e kritereve për liberalizim të vizave.

Realisht ky është një moment dhe proces në prioritet shumë të lartë në agjendat e të gjitha institucioneve dhe një projekt nacional në të mirë të qytetarit dhe këtu të gjithë i kemi obligimet e veta në mënyrë që të dalim faqe bardhë dhe procesin e liberalizmit të vizave ta përfundojmë në kohën më të shpejtë të mundshme”, theksoi Rexhepi.

Qeveria e Republikës së Kosovës në qershor të këtij viti ka pranuar udhërrëfyesin për liberalizmin e vizave.

Sundimi i ligjit, luftimi i krimit të organizuar dhe korrupsionit, tashmë janë disa nga kriteret për Kosovën krahas parakushteve tjera, si siguria e dokumenteve personale, menaxhimi i integruar i kufirit dhe ri-integrimi dhe riatdhesimi.

Kosova dhe qytetarët e saj aktualisht mbeten më të izoluarit në Evropë, sa i përket lirisë së lëvizjes, kurse një faktor që ka ndikuar në këtë aspekt ka qenë edhe droja e vendeve evropiane se nëse i heqin vizat për kosovarët, shumë të rinj do t’ia mësynë Evropës për strehim dhe punë, për shkak të kushteve të rënda ekonomike në vend.

Komentet (2)

Ky forum është mbyllur
XS
SM
MD
LG