Presidenti amerikan, Barack Obama, ka thënë mbrëmë se mirëkuptimi kornizë bërthamor me Iranin është “mundësi njëherë në jetë” për ta parandaluar Iranin nga zhvillimi i armatimit bërthamor dhe për të sjellë siguri në Lindjen e Mesme.
Në një intervistë për të përditshmen New York Times, zoti Obama theksoi se përfitimet potenciale të marrëveshjes provuese, për ta ndalur programin e armatimit bërthamor në këmbim për lehtësim të sanksioneve të ashpra ekonomike, janë shumë më të mëdha se rreziqet.
Zyrtarët nga 6 fuqitë botërore, Britania, Franca, Gjermania, Kina, Rusia dhe Shtetet e Bashkuara, kanë arritur marrëveshje kornizë për programin kundërthënës bërthamor të Iranit, më 2 prill në Lozanë të Zvicrës, pas disa muajve të negociatave.
Marrëveshja finale duhet të arrihet deri më 30 qershor.
Obama theksoi se Izraeli ka të drejtë të jetë i shqetësuar për programin bërthamor iranian, por mbrojta e Uashingtonit për Izraelin është e “palëkundur”.