Ndërlidhjet

Sundimi i ligjit ndihmon Kosovën në zhvillimin ekonomik


Ilustrim@Shutterstock
Ilustrim@Shutterstock

Zyrtarë të lartë të institucioneve të Kosovës, por edhe ambasadorët ndërkombëtarë, u kanë bërë thirrje gjyqtarëve dhe prokurorëve që të luftojnë krimet të cilat tashmë janë shndërruar në dukuri negative.

Ata kanë thënë se pa forcimin e sundimit të ligjit për luftimin e dukurive negative, siç janë korrupsioni e krimi i organizuar, Kosova nuk mund të përparojë.

Me rastin e inaugurimit të Prokurorisë Themelore në komunën e Gjilanit, ambasadori amerikan në Kosovë, Greg Delawie, tha se forcimi i sundimit të ligjit në Kosovë është shumë i rëndësishëm për Kosovën dhe qytetarët e saj.

“Kur ekziston sundimi i ligjit, njerëzit përparojnë dhe ekonomia zhvillohet. Shtetet e Bashkuara të Amerikës mbështesin iniciativat në Kosovë të cilat i ndihmojnë kapacitetet për të ndihmuar sistemin e drejtësisë si të përgjegjshme”, tha Delawie.

Kryeprokurori i Shtetit, Aleksandër Lumezi, theksoi se prokurorët duhet të luftojnë krimin në mënyrë sa më efektive dhe nuk duhet të lejojnë në asnjë rast ndikime nga jashtë.

Lumezi tha se prokurorët duhet të kenë guxim dhe profesionalizëm për të luftuar dukuritë negative.

“Korrupsioni, terrorizimi, krimi i organizuar, dukuri këto që janë duke rrezikuar sigurinë, paqen dhe drejtësinë e vendit tonë dhe me gjerë duhet të luftohen”.

“Vlerat e drejtësisë po nënvizohen gjithnjë e më shumë si kushte dhe kritere për liberalizmin e vizave dhe në mënyrë të pashmangshme ky sistem është treguesi më i mirë për suksesin apo dështimin e vendit tonë në procesin e integrimeve evropiane”, tha Lumezi.

Sistemi i drejtësisë në Kosovë ka ligje dhe është i kompletuar me gjyqtarë dhe prokurorë, ka deklaruar Hajredin Kuçi, ministër i Drejtësisë në Qeverinë e Kosovës. Ai tha se tani është koha që dukuritë negative të luftohen si kurrë me parë.

“Dukuritë negative në vendin tonë si krimi dhe korrupsioni, shkeljet e të drejtave të njeriut, duhet të kenë adresë të kryerësve, por edhe të ndëshkimit. Nëse mund të pajtohemi se drejtësia është fakt jo perceptim, siç mund të jetë kohë pas kohe politike, atëherë ne në drejtësi duhet të punojmë në bazë të fakteve”.

“Hapin në mes të prokurorisë, gjykatës dhe policisë, duhet ta afrojmë edhe më shumë”, tha Kuçi.

Kuçi tha se për të fituar besimin e qytetarëve, gjykatat dhe prokuroritë duhet të jenë edhe më funksionale.

“Ne nuk duhet t’i tolerojmë shkelësit e ligjit, por më lejoni të them se nuk duhet t’i tolerojmë as tolerantët e shkeljes së ligjit. Natyrisht, nuk duhet të lejojmë që veprimet e disa individëve të zbehin imazhin në drejtësi dhe besimin e qytetarëve për ne”, tha Kuçi.

Sistemi i drejtësisë në Kosovë, në përgjithësi është kritikuar si një sistem i korruptuar dhe se qytetarët nuk kanë besimin e duhur në ketë sistem për shkak të kryerjes së veprave të ndryshme penale nga gjyqtarët dhe prokurorët, të cilët shpesh është vlerësuar se nuk kanë qenë profesional, të paanshëm dhe të pavarur në marrjen e vendimeve dhe kryerjen e detyrave të tyre.

Organizatat joqeveritare në Kosovë, që monitorojnë punën e gjykatave, kanë deklaruar se jotransparenca dhe llogaridhënia në gjyqësor, kanë bërë që besimi në gjykata të cilat ndajnë drejtësinë, të jetë i vogël.

XS
SM
MD
LG