Ndërlidhjet

Dëme të mëdha nga vërshimet në Kosovë


Arkiv
Arkiv

Si pasojë e reshjeve të vazhdueshme të shiut dhe shkrirjes së borës, në disa komuna të Kosovës ka pasur vërshime të mëdha.

Zyrtarë nga Agjencia e Menaxhimit të Emergjencave, e cila funksionon në kuadër të Ministrisë së Punëve të Brendshme të Qeverisë së Kosovës, thanë për Radion Evropa e Lirë se dëmet e shkaktuara nga vërshimet janë të mëdha.

Shefi i qendrës operative në Agjencinë e Menaxhimit të Emergjencave, Mahir Hasani, tha se gjendja në komunat ku ka pasur vërshime është e rëndë.

“Nuk mund të japim me saktësi vlerën e dëmeve, por mund të them se ka dëme te konsiderueshme. Komisionet do të dalin në terren, do ta bëjnë vlerësimin dhe pastaj mund të flasim për dëmet të cilat kanë ndodhur”, tha Hasani.

Aktualisht, sipas Hasanit, gjendja në komunat ku ka pasur vërshime është e qetë dhe se ka filluar të bie niveli i ujit nëpër lumenj.

Ai u kanë bërë thirrje drejtuesve të komunave që të punojnë më shumë në rregullimin e shtratit të lumenjve.

“Kuvendet komunale duhet t’i kushtojnë një vëmendje më të madhe kësaj çështjeje. Duhet t’i rrisin buxhetet e tyre dhe të kërkojnë fonde, pasi më mirë është që të parandalojnë diçka të tillë se sa të merren me pasojat".

"Në përgjithësi Kosova duhet të ndërmerr masa parandaluese, pasi po shihet se ka probleme. Edhe qytetarët duhet të jenë të vetëdijshëm që në lumenj të mos hedhin mbeturina. Ne kemi vërejtur se në disa lumenj ka të hedhura edhe automjete [të vjetra]”,shpjegoi Hasani.

Gjendje e rëndë nga vërshimet është edhe në Komunën e Malishevës, ku dëmet janë të mëdha, por pa pasoja në njerëz.

Kryetari i Komunës së Malishevës, Ragip Begaj, i tha Radios Evropa e Lirë se si pasojë e daljes nga shtrati të lumit Mirusha, ka vërshime në qendër të kësaj komune dhe pothuajse në çdo fshat.

“Dëmet janë jashtëzakonisht të mëdha. Janë dëmtuar bizneset, shtëpitë dhe familjet. Ka edhe makina të dëmtuara, por fatmirësisht nuk kemi dëme në njerëz. Gjatë natës e kemi përcjellë gjendjen. Rrugët janë të kalueshme dhe niveli i ujit ka rënë”, tha Begaj.

Përfaqësuesit e Agjencisë për Menaxhimin e Emergjencave thanë se nga vërshimet e një dite më parë komunat që më se shumti janë dëmtuar janë ajo e Malishevës, Suharekës, Lipjanit, Shtimes dhe Gjakovës.

Kryetarja e Komunës së Gjakovës, Mimoza Kusari- Lila tha se gjendja aktuale nga vërshimet është e stabile.

“Dëmi më i madh është bërë në procesin mësimor. Dita e parë e mësimit të gjysmë vjetorit të dytë për nxënësit e shkollave fillore dhe të mesme ka rezultuar me vështirësi të mëdha. Janë dy elemente: ai i infrastrukturës rrugore, gjegjësisht rrugët që kanë qenë në proces të rindërtimit, e që çojnë deri të objektet shkollore, si dhe objektet më të vjetra shkollore, ku ka pasur sasi me të madhe të borës dhe uji ka depërtuar brenda”, tha Kusari-Lila.

Kryeministri i Kosovës, Isa Mustafa ka kërkuar nga mekanizmat kompetent të sigurisë dhe emergjencave që të koordinohen me autoritetet lokale në komunat ku pa pasur vërshime, si dhe të ndërmarrin të gjitha masat e nevojshme për të tejkaluar këtë situatë dhe për t’iu ardhur në ndihmë qytetarëve.

Në Institutin Hidrometeorologjik të Kosovës thonë se gjatë tri ditëve në vijim prurjet e ujit dhe niveli nëpër shumicën e lumenjve të Kosovës do të karakterizohet me rritje graduale.

Ata thonë se kjo situatë do të vazhdojë deri më datën 10 janar të këtij muaji, kur niveli i ujit do të bie gradualisht.

XS
SM
MD
LG