Ndërlidhjet

Buxheti i varfër nuk garanton shërbime cilësore shëndetësore as më 2017 


QKUK

Buxheti i planifikuar për shëndetësinë në Kosovë, për vitin 2017 nuk parasheh ngritje. Ky buxhet ka mbetur i njëjtë me këtë vit, që kap vlerën prej 180 milionë euro.

Profesionistë shëndetësorë, por edhe udhëheqës të Federatës Sindikale të Shëndetësisë, thonë se me buxhetin e ndarë për vitin e ardhshëm, shëndetësia do të vazhdojë të përballet me shumë sfida, sikur edhe vitet paraprake.

Zyrtarë të Qendrës Klinike Universitare të Kosovës, kanë bërë të ditur se gjatë këtij viti qysh në fillim të planifikimit të blerjes së barnave, iu kanë munguar 5 milionë euro.

Lista esenciale me barna, që nga paslufta, asnjëherë nuk ka arritur të përmbushet 100 për qind.

Kryetari i Federatës Sindikale të Shëndetësisë, Blerim Syla i ka thënë Radios Evropa e Lirë se do të adresojnë në instanca të larta shqetësimet e tyre lidhur me buxhetin, në mënyrë që si i tillë, ai të mos aprovohet, por të shqyrtohet mundësia e rritjes.

“Ne kemi analizuar mirë buxhetin e vitit 2017 për shëndetësi dhe nuk ka rritje e që është thënë se do të jetë prioritet për qeverinë. Ne si federatë sindikale do t'i adresojmë shqetësimet të gjitha instancave që të mos aprovohet si i tillë".

"Përndryshe ne nuk do të marrim përgjegjësi për rrjedhën në shëndetësi me këtë buxhet. Nuk do ta marrim si punëtorë shëndetësorë. Edhe populli duhet ta kuptojë që nuk do të ketë shërbime të mirëfillta me një buxhet kaq të varfër”, ka thënë Syla.

Por, Ministri i Shëndetësisë në Qeverinë e Kosovës, Imet Rrahmani ka dhënë disa hollësi lidhur me buxhetin, duke përmendur edhe mbledhjen e premiumeve nga Ligji për Sigurime Shëndetësore, do të rritet buxheti për vitin 2017.

“Ne do të kemi buxhet shtesë edhe për këta dy muajt e mbetur të vitit. Këto janë premtimet e Ministrit të Financave. Rreth 180 milion euro do të jetë buxheti total në vitin 2017”.

“Ne do t’i kemi paratë shtesë nga Ligji për Sigurime Shëndetësore, me mbledhjen e premiumeve. Mendoj se do të ketë ndikim pozitiv për zgjedhjen e problemit me furnizim me barna dhe material harxhues dhe më vonë do të duken edhe efektet tjera nga ky ligj. Vendimi I Qeverisë është që ky ligj të hyjë në fuqi me 1 janar 2017”, ka thënë Rrahmani.

Për sfidat që janë ballafaquar dhe parashihet të ballafaqohen edhe vitin e ardhshëm, flet dhe drejtori i klinikës Emergjente, Basri Lenjani.

Sipas tij, qendra emergjente, si qendër terciare referente për tërë Kosovën, gjatë gjithë vitit ka pasur mungesë të barnave dhe materialit shpenzues.

“Në bazë të raportit mbi buxhetin për vitin e ardhshëm dhe në bazë të vlerësimit tim, është një buxhet që me vështirësi do t'i plotësojë nevojat e qytetarëve duke pasur parasysh rritjen e numrit të patologjive të ndryshme. Edhe në vitin e ardhshëm do të ballafaqohemi me të njëjtat probleme dhe kërkesa që vështirë do të plotësohen”.

“Sa i përket buxhetit aktual që kemi pasur, është shumë problem që të arrijmë t'i menaxhojmë rastet emergjente, e që konsiderohen si shpenzuesit më të mëdhenjë të barnave dhe materialit harxhues. Buxheti i vogël do të na sfidojë edhe vitin e ardhshëm”, ka thënë Lenjani.

Sidoqoftë Ministri i Financave, Avdullah Hoti, siguroi se Projektligji që kaloi në Qeveri është i hartuar në pajtim me Fondin Monetar Ndërkombëtar dhe pritet që të ndikojë në rritjen ekonomike mbi 4 për qind në vitin e ardhshëm.

Tani, procedurat kërkojnë që Projektligji t’i dorëzohet Kuvendit të Kosovës, ku pas shqyrtimit nëpër komisionet përkatëse, pritet të vihet për miratim, para datës 20 dhjetor të këtij viti. (REL)

  • 16x9 Image

    Ariana Kasapolli - Selani

    Ariana Kasapolli - Selani ka lindur më 15.04.1980 në Prishtinë. Shkollimin fillor, të mesëm dhe universitar e ka ndjekur në Prishtinë, ku edhe ka diplomuar në Fakultetin e Gazetarisë. Si korrespondente e Radios Evropa e Lirë punon që nga viti 2009. Është e martuar dhe ka tre fëmijë.

Facebook Forum

XS
SM
MD
LG