Ndërlidhjet

Trump premton të jetë president i të gjithë amerikanëve

Donald Trump, biznesmen miliarder, ka fituar zgjedhjet presidenciale në Shtetet e Bashkuara. Ai do të udhëheqë Shtëpinë e Bardhë në katër vjetët e ardhshëm.


Donald Trump

Përmbledhja

Kandidati republikan, Donald Trump, është zgjedhur presidenti i 45-të i Shteteve të Bashkuara. Ai do të udhëheqë Shtëpinë e Bardhë në katër vjetët e ardhshëm. Trump ka fituar 276 vota elektorale. Trump, manjat i pasurive të patundshme, pa përvojë politike, ka mposhtur rivalen demokrate, Hillary Clinton. Ai ka premtuar se do ta bëjë Amerikën “të madhe përsëri”, me krijimin e më shumë vendeve të punës dhe me uljen e taksave. Trump është zotuar se do të ngrejë mur në kufirin SHBA-Meksikë dhe se do të kufizojë hyrjen e myslimanëve në SHBA. Ai vazhdimisht e ka lavdëruar presidentin rus, Vladimir Putin, duke e cilësuar si “lider të madh”. Vlera neto e pasurisë së Trumpit llogaritet midis 3 miliardë dhe 3.7 miliardë dollarë.

11:54 9.11.2016

Irani thotë se Trumpi duhet të qëndrojë prapa marrëveshjes bërthamore

Ministri i jashtëm i Iranit, Mohammad Javad Zarif, tha se presidenti i zgjedhur amerikan, Donald Trump, duhet të mbes i përkushtuar ndaj marrëveshjes bërthamore të nënshkruar ndërmjet fuqive botërore dhe Teheranit.

Gjatë fushatës zgjedhore, Trump ishte zotuar se do ta "shkatërronte" marrëveshjen bërthamore, të cilën e quajti "një prej marrëveshjeve më të këqija që është negociuar ndonjëherë."

"Çdo president amerikan duhet ta kuptojë realitetin e botës sot", ka thënë Zarif, citon agjencia e lajmeve Tasnim.

'Më e rëndësishmja është që presidenti i ardhshëm amerikan të qëndrojë prapa marrëveshjes, për angazhimet e ndërmarra", ka thënë Zarif, i cili po realizon një udhëtim në Rumani.

11:40 9.11.2016

Zyrtarët evropianë urojnë Trumpin

​Udhëheqësit e lartë të BE-së, Donald Tusk dhe Zhan Klod Junker, i kanë dërguar urime presidentit të zgjedhur Donald Trump dhe e kanë ftuar për të vizituar Evropën.

11:36 9.11.2016

Republikanët kontrollojnë Senatin dhe Dhomën e Përfaqësuesve

Partia Republikane ka mbajtur kontrollin në të dyja dhomat e Kongresit amerikan në zgjedhjet e 8 nëntorit, duke ruajtur shumicën, gjë që mund të sjell fuqi të konsiderueshme legjislative për presidentin e sapozgjedhur nga radhët e republikanëve, Donald Trump.

Kjo ishte një nga fushatat më përçarëse në historinë moderne të politikës amerikane.

Republikanët mbrojtën ulëset e Senatit në shtete si Pensilvania, Karolina e Veriut, Florida dhe Nju Hempshir, ku një pjesëmarrje e konsiderueshme e demokratëve kishte potencialin që të shkonte kundër kandidatëve të tyre.

Por, në vend të kësaj, republikanët arritën të siguronin pragun prej 52 me 48, në dhomën e lartë prej 100 anëtarësh, një rënie prej dy ulësesh, por ende e mjaftueshme për të marrë vota të rëndësishme ndaj rivalëve të tyre demokratë.

"Pas tetë vitesh të administratës Obama, njerëzit amerikanë kanë vendosur për një drejtim të ri për vendim tonë. Presidenti i zgjedhur Trump ka një mundësi të rëndësishme që ta bashkojë sërish vendin", ka thënë udhëheqësi i shumicës në Senat, Mitch McConnell, nga Kentaki.

"Kam shpresën dhe qëllimin që ne t'ia dalim me sukses në vitet në vijim, duke punuar së bashku me kolegët tanë, për të forcuar vendin tonë dhe sigurinë ekonomike", ka shtuar ai.

Republikanët arritën ta dominojnë edhe Dhomën e Përfaqësuesve, që përbëhet nga 435 ulëse, dhe kjo parti do ta mbajë edhe kontrollin e kësaj Dhome.



10:49 9.11.2016

Tronditet bursa botërore, rënie e vlerave të aksioneve

Fitorja e republikanit Donald Trump në zgjedhjet presidenciale ka tronditur bursat botërore, me rënien dramatike të vlerave të aksioneve dhe me frikën e investitorëve për paqartësinë në sektorin financiar, migracionin dhe tensionet gjeopolitike.

Në një moment indekset e Dow Future ranë për më shumë se 4 për qind, kurse indeksi më i madh japonez ra për më shumë se 6.1 për qind, rënia më e madhe e shënuar ndër vite.

Vlerat e aksioneve në SHBA ranë deri në 5 për qind në një moment, më keq se sa rënia pas vendimit të Britanisë për t’u larguar nga BE-ja.

Trego më shumë

XS
SM
MD
LG