Ndërlidhjet

Shteti Islamik merr përgjegjësinë për sulmin në Berlin

  • RFE /RL

Berlin

Grupi militant Shteti Islamik (IS) tha se një prej militantëve të tij ka kryer sulmin me kamion në tregun e Krishtlindjeve në Berlin, ku kanë mbetur të vrarë 12 veta.

Identiteti i sulmuesit nuk është bërë i ditur dhe, tash për tash, nuk është konfirmuar as pohimi i IS-it, i bërë në agjencinë e tij të lajmeve.

Prokurorët gjermanë, në anën tjetër, thanë se personi, i cili u arrestua pas sulmit, është liruar për shkak të provave të pamjaftueshme.

Para lirimit, shefi i policisë në Berlin, Klaus Kandt, tha se nuk mund të konfirmojë se i dyshuari në paraburgim është shoferi i kamionit.

Ngjashëm u shpreh edhe prokurori federal, Peter Frank:

"Nuk e përjashtojmë teorinë se i ndaluari mund të mos jetë autori".

"Mënyra e sulmit dhe caku sugjerojnë se bëhet fjalë për ekstremizmin islamik", tha Frank.

Sulmi që është cilësuar si “terrorist” nga kancelarja gjermane, Angela Merkel, ka ndodhur të hënën mbrëma, kur një person ka përplasur kamionin për turmën në një treg të Krishtlindjeve në Berlin. Pos të vrarëve, 48 veta janë plagosur

“Ka shumë gjëra që nuk i dimë me shumë siguri, por, tani për tani, duhet ta vlerësojmë si sulm terrorist”, tha Merkel.

“Do të ishte veçanërisht e vështirë për të gjithë ne nëse konfirmohet se personi që ka kryer këtë akt, është dikush që ka kërkuar mbrojtje dhe azil”, shtoi Merkel.

I dyshuari që po mbahej në paraburgim është migrant, 23 vjeç, nga Pakistani, i cili ka jetuar në një strehimore për refugjatët në Berlin.

Ai është arrestuar pranë tregut të Krishtilindjeve, derisa ka bërë përpjekje të ikë nga vendi i ngjarjes.

Sipas disa njoftimeve, ai ka hyrë në Gjermani vitin e kaluar.

Merkel, për kohë të gjatë, është kritikuar për vendimin e saj në vitin 2015 që të pranojë në Gjermani një milion migrantë – shumica nga Siria, Iraku dhe Afganistani.

Shumë gjermanë e shohin integrimin e tyre si sfidën më të madhe për vendin.

Policia gjermane ka gjetur edhe një person në ulësen e pasagjerit të kamionit që është përdorur në sulm. Ai ka vdekur në vendin e ngjarjes, pavarësisht përpjekjeve mjekësore për ta shpëtuar.

Policia gjermane tha se është duke punuar mbi supozimin se kamioni, me targa të Polonisë, është vjedhur.

Transmetuesi polak TVN 24 tha se ai i përkiste një kompanie të kamionëve në Poloni.

Pronari i kompanisë, Ariel Zuraësi, u tha mediave se shoferi i kamionit, kushëri i tij, ka transportuar çelik në Berlin dhe se tani është zhdukur.

“Ata mund t’i kenë bërë diçka shoferit tim”, tha Zuraëski.

Incidenti ka bërë që Franca, e cila është përballur me një sulm të ngjashëm me kamion, në muajin korrik, të forcojë sigurinë në tregjet e Krishtlindjeve në gjithë vendin.

Shtëpia e Bardhë e ka dënuar sulmin, duke e cilësuar si të tmerrshëm.

Departamenti amerikan i Shtetit ka lëshuar një alarm udhëtimi për Evropë, në muajin nëntor, duke paralajmëruar amerikanët për “rrezik të madh” nga sulmet terroriste, sidomos gjatë sezonit të festave.

Pas incidentit të së hënës në Berlin, presidenti i zgjedhur i Shteteve të Bashkaura, Donald Trump, fajësoi “terroristët islamikë”, pa përmendur prova.

“Këta terroristë dhe rrjetet e tyre rajonale dhe globale duhet të zhduken nga faqja e Tokës. Këtë mision do ta kryejmë me të gjithë partnerët liridashës”, tha Trump.

Përgatiti: Valona Tela

Facebook Forum

XS
SM
MD
LG