Senatorja australiane, Pauline Hanson, ka veshur burka, një veshje islame ku mbulohet krejtësisht fytyra, teksa ka dalë në foltoren në Dhomën e Lartë të Parlamentit.
Me këtë gjest, ajo është përpjekur që të shtyjë përpara kërkesën e partisë së saj të ekstremit të djathtë, që të ndalojë veshjen e burkas në publik.
Hanson e mbajti të veshur burkan për më shumë se 10 minuta dhe më pas e hoqi dhe tregoi, pse sipas saj, duhet ndaluar mbulimi i plotë i fytyrës.
“Askush nuk duhet të lejojë që dikush të fshihet pas një velloje, përderisa ka shqetësime për sigurinë”, tha ajo.
Prokurori i Përgjithshëm në Australi, George Bradis ka thënë se Qeveria nuk do ta ndalojë veshjen e burkas.
Ai ka thënë se veprimi i senatores Hanson rrezikon të zemërojë rreth 500 mijë australianë, të cilët i përkasin fesë islame.