Ndërlidhjet

Lajm i jashtëzakonshëm

A. Saudite e akuzoi Iranin për “agresion ushtarak”


Koalicioni ushtarak i udhëhequr nga Arabia Saudite e ka fajësuar Iranin për lansimin e një rakete balistike nga kryengritësit shiitë huthi nga Jemeni, në drejtim të kryeqytetit saudit, Riad, duke tërhequr vërejtjen se kjo mund të “konsiderohet si akt i luftës” dhe se e rezervon “të drejtën për përgjigje”.

Koalicioni i udhëhequr nga Arabia Saudite sot, po ashtu, e ka mbyllur qasjen për në Jemen nga toka, deti dhe ajri, pasi para dy ditësh Riadi ishte cak i një rakete balistike. Është thënë se mbyllja e përkohshme do ta ketë parasysh punën e grupeve humanitare.

Sauditët thonë se e kanë goditur raketën para se ajo ta qëllonte cakun e saj.

Në kumtesën e sotme, theksohet se “roli i Iranit dhe komanda e tij direkte ndaj grupit huthi, në këtë çështje, paraqet akt të qartë të agresionit duke i marrë në shënjestër vendet fqinje dhe e kërcënon paqen dhe sigurinë në rajon dhe globalisht”.

Irani i ka hedhur poshtë akuzat e Arabisë Saudite, duke thënë se kryengritësit huthi e kanë lansuar raketën në shenjë të hakmarrjes për atë që e ka quajtur “krime lufte” nga ana e Arabisë Saudite në Jemen, që është i përfshirë nga lufta shkatërruese.

Mëtutje, në deklaratë, Irani tha se sulmi i sotëm raketor ishte “aksion i pavarur në përgjigje të këtij agresioni” dhe Irani nuk ka asgjë të përbashkët me atë.

XS
SM
MD
LG