Koreja e Veriut dhe Rusia do të jenë në mesin e çështjeve që do të diskutojnë ministrat e Jashtëm të NATO-s në takimin e tyre dyditësh, që nis sot.
Takimi në Bruksel vjen një javë pasi Phenjani ka testuar një raketë balistike ndërkontinentale, që, sipas zyrtarëve verikoreanë, mund të godasë kudo në Shtetet e Bashkuara.
Sekretari i përgjithshëm i NATO-s, Jens Stoltenberg, tha të hënën se NATO-ja dhe komuniteti ndërkombëtar duhet të bëjnë "presion maksimum" mbi regjimin verikorean, sepse përshkallëzimi i situatës në luftë do të kishte, sipas tij, "pasoja katastrofike".
Për Rusinë, aleatët pritet të diskutojnë strategjinë e diplomacisë, pasi konflikti në lindje të Ukrainës mbetet i pandryshuar.
Diskutime do të mbahen edhe për bashkëpunimin midis NATO-s dhe Bashkimit Evropian, luftën kundër terrorizmit dhe zgjerimin e mundshëm të aleancës me Maqedoninë, Gjeorgjinë dhe Bosnje-Hercegovinën.
