Punëtorë humanitarë të Kombeve të Bashkuara kanë kushtëzuar shumë gra siriane për marrjen e ndihmave në këmbim të favoreve seksuale. Të përfshirë në këso raste të shfrytëzimit të grave siriane janë edhe pjesëtarë të tjerë të organizatave bamirëse.
Një raport i UNFPA-së që bëri një vlerësim të dhunës gjinore arriti në përfundimin se ndihma humanitare po shkëmbehej për seks në rajone të ndryshme të Sirisë.
Raporti i titulluar "Zërat nga Siria 2018", ka evidentuar shembuj të grave dhe vajzave që u martuan me zyrtarë për një periudhë të shkurtër kohore për 'shërbime seksuale' me qëllim të marrjes së ushqimeve.
Po ashtu në raport thuhet se shpërndarësit e ndihmave kanë kërkuar numrat e telefonit të grave dhe vajzave, duke i obliguar ato që t’i shoqërojnë në shtëpi për të kaluar natën me to.
"Gratë dhe vajzat, pa mbrojtës meshkuj, vejushat, të divorcuarat si dhe personat e zhvendosur, ishin trageti kryesor i shfrytëzuesve seksualë", thuhet në raport.
Shfrytëzimin e grave siriane e kanë konfirmuar për BBC-në punëtorë humanitarë që kanë qenë në Siri.
Ata i thënë këtij mediumi se shfrytëzimi është aq i përhapur saqë disa gra siriane po refuzojnë të shkojnë në qendrat e shpërndarjes së ndihmave sepse njerëzit do të mendonin se kishin ofruar trupat e tyre për ndihmat që ato i sillnin në shtëpi.
Për shfrytëzimin e grave siriane u raportua fillimisht tre vjet me parë. Danielle Spencer, një këshilltare humanitare që punonte për një organizatë bamirëse, dëgjoi për akuzat e një grupi të grave siriane në një kamp refugjatësh në Jordani në mars të vitit 2015.
Spencer kishte treguar si disa nga këto gra i kishin rrëfyer asaj se si burrat në rajone të tilla si Daraa dhe Quneitra u kishin ofruar atyre ndihma të ndryshme për seks.
