Ndërlidhjet

Delawie: Dekurajuese dorëheqja e prokurorit Blakaj


Ambasadori i SHBA-së në Prishtinë, Greg Delawie
Ambasadori i SHBA-së në Prishtinë, Greg Delawie

Ambasadori i Shteteve të Bashkuara në Prishtinë, Greg Delawie ka thënë se është ditë e pikëlluar për sundimin e ligjit në Kosovë, pas dorëheqjes së prokurorit special, Elez Blakaj, si pasojë e kërcënimeve që kishte pranuar për shkak të punës së tij.

Prokurori Blakaj, i cili ka dhënë dorëheqje, ishte duke hetuar disa raste të terrorizmit dhe dyshimet për manipulime me listat e veteranëve të Ushtrisë Çlirimtare të Kosovës.

Ambasada amerikane në Prishtinë thotë se është dekurajuese lajmi për dorëheqjen e prokurorit Blakaj.

“Është dekurajuese të dëgjosh lajmin për dorëheqjen e prokurorit special, Elez Blakaj, posaçërisht pasi ai po punonte në çështje të rëndësishme siç janë mashtrimet e mëdha në listat e veteranëve. Por, gjithashtu për shkak të të kaluarës së tij – ai kishte pasur mbështetjen e Qeverisë amerikane për të studiuar në Wake Forest, ku mori diplomën në LLM dhe hetoi raste të rëndësishme në Kosovë. Kosova duhet të dëshmojë përkushtimin e saj për sundim të ligjit, jo vetëm duke mbështetur prokurorët, por gjithashtu duke siguruar që të gjithë ata që janë të dënuar të vuajnë në burg vitet e tyre të dënimit”, thuhet në reagimin e ambasadës amerikane.

Edhe Kryeprokurori i Shtetit, Aleksandër Lumezi ka reaguar pas dorëheqjes së prokurorit Blakaj, duke thënë se institucioni që ai udhëheq, zyrtarisht nuk është njoftuar se Blakaj ka dhënë dorëheqje për shkak të kërcënimeve.

XS
SM
MD
LG