Ndërlidhjet

Gashi: Qeveria s'e ka ndaluar hyrjen e zyrtarëve serbë në Kosovë


Qeveria e Kosovës

Qeveria e Kosovës nuk ka marrë vendim që u ndalon hyrjen në Kosovë të gjithë zyrtarëve nga Serbia, u konfirmua nga kabineti i kryeministrit Ramush Haradinaj.

Sqarimet vijnë një ditë pasi që Ministria e Punëve të Jashtme e Kosovës, përmes shefit të kabinetit të ministrit të Jashtëm, Jetlir Zyberaj, ka komunikuar lajmin përmes profilit të tij në facebook për marrjen e vendimit për të mos lejuar hyrjen e zyrtarëve serbë në Kosovë.

Por, Donjeta Gashi, zëdhënëse e kryeministrit Ramush Haradinaj, tha shkurt për Radion Evropa e Lirë se “Qeveria e Kosovës nuk ka marrë një vendim të tillë”.

Të premten, edhe televizioni publik në Serbi citoi kryeministren serbe, Ana Bërnabiq, të ketë thënë se në Samitin e Vendeve të Ballkanit Perëndimor në Poznan të Polonisë ka dëgjuar nga kryeministri i Kosovës, Ramush Haradinaj, të ketë thënë se vendimi për ndalimin e hyrjes së zyrtarëve serbë në Kosovë është një “lajm i rremë”.

“Mua më habit se si lajmet e rreme në Prishtinë ose në institucionet e përkohshme të Prishtinës, i përhapin këshilltarët e të ashtuquajturit ministër i Punëve të Jashtme. Por, me vjen mirë që deri diku ulen tensionin që është i madh në rajon “, tha Bërnabiq.

Në anën tjetër, Zyberaj këmbënguli se lajmi nuk është i rremë.

“Vendimi për të mos lejuar hyrjen e zyrtarëve serbë në Kosovë për sa kohë që ata provokojnë tensione dhe vazhdojnë me propagandën dhe fushatën hibride ndaj vendit tonë, është në përputhje me politikën e qeverisë, të aplikuar që nga vendimi për vendosjen e tarifave tregtare kundër Serbisë, si vendim kombëtar për të mbrojtur interesat dhe sigurinë kombëtare të Kosovës dhe për të parandaluar veprime të mëtejshme agresive nga Serbia kundër Kosovës”, tha të premten për Radion Evropa e Lirë Zyberaj.

“Sjelljet agresive të Serbisë, duke inskenuar të ashtuquajturën krizë humanitare, duke arrestuar qytetarët e Kosovës, duke e kundërshtuar Kosovën ndërkombëtarisht dhe duke krijuar një fushatë të lajmeve dhe propagandës së rreme kundër Kosovës, të paparë më parë, duhet të ndalen”, tha Zyberaj.

Sipas tij, në momentin kur krijohen kushtet dhe Serbia tërhiqet nga “tensionet e inskenuara në Kosovë”, ky vendim do të hiqet.

“Topi është në anën e Serbisë për të vepruar si një fqinj konstruktiv. Shovinizmin e deklaratave te Bërnabiqit e njeh e tërë bota. Ajo është person ‘non grata’ në Kosovë”, tha Zyberaj.

Njohësi i zhvillimeve politike, Artan Muhaxhiri, duke folur për Radion Evropa e Lirë, thotë se vendimi i Ministrisë së Jashtme të Kosovës pa mbështetjen e Qeverisë dhe kryeministrit, është i pavlefshëm, i gabueshëm dhe nuk ka gjasa as teorike që të hyjë në fuqi. Në të kundërtën, siç thotë ai, kjo situatë tregon për mungesën e koordinimit brenda Qëeverisë së Kosovës.

“Ku ka qenë një incident i një këshilltari të papërgjegjshëm, i cili ka dashur që të faktorizohet, të dalë në medie dhe të përfitojë një relevancë të rrejshme në medie. Është një tentim që të faktorizohet një person, krejtësisht i papeshë politike. Pra, ka qëenë një vendim krejtësisht i gabuar, i cili nuk ka asnjë gjasë që të realizohet”, tha Muhaxhiri.

Ai ka shtuar se e gjithë kjo situatë e dëmton politikën e Kosovës, e cila tashmë duket se është “krejtësisht e pakoordinuar”.

“Secili politikan i rangut të ulët mund të dalë në opinion me një vendim kaq të madh, pa i kaluar filtrat politik dhe të përgjegjësisë partiake dhe qeveritare. Prandaj, është një imazh shumë i keq për Kosovën, sepse tregon që ekziston një mos-koordinim ndërmjet ministrive dhe kryeministrit, për sa i përket raportit institucional të Kosovës ndaj Serbisë”, theksi Muhaxhiri.

Në lidhje me këto zhvillime, të enjten është prononcuar edhe zëdhënësja e Bashkimit Evropian, Maja Kocijançiq.

Ajo ka thënë se BE-ja pret që të dyja palët t’i respektojnë marrëveshjet tashmë të nënshkruara në kuadër të dialogut ndërmjet Prishtinës dhe Beogradit në Bruksel, përfshirë edhe marrëveshjen për vizitat e zyrtarëve.

Ajo ka thënë se Brukseli është në kontakt me palët (Prishtinën dhe Beogradin) në lidhje me këtë veprim.

  • 16x9 Image

    Amra Zejneli-Loxha

    Ka lindur në Mitrovicë në vitin 1986. Studimet universitare i ka përfunduar në fushën e gazetarisë dhe të studimeve evropiane në Universitetin e Floridas në SHBA. Me gazetari ka nisur të merret nga viti 2001. Punon në transmetuesin publik – Radio Televizionin e Kosovës – si redaktore përgjegjëse në programin e gjuhëve të komuniteteve, ndërkaq Radios Evropa e Lirë i është bashkuar në vitin 2010.

XS
SM
MD
LG