Policia e Kosovës ka konfirmuar për Radion Evropa e Lirë se ka suspenduar gjashtë zyrtarë të Stacionit Policor të Gjakovës, përkatësisht, një major, një kapiten, një rreshter dhe tre zyrtarë policorë, derisa ndaj tyre të përfundojnë hetimet penale.
Inspektorati Policor i Kosovës ka thënë përmes një komunikate për media se suspendimi i tyre ka ardhur pasi ky trup ka pranuar disa informacione nga Avokati i Popullit lidhur me dyshimet se këta zyrtarë kanë tejkaluar autorizimet policore.
Përveç kësaj në njoftim është bërë e ditur se Inspektorati Policor ka nisur hetimet ndaj këtyre personave mbi dyshimet për kryerje të veprës penale, keqtrajtim gjatë ushtrimit të detyrës zyrtare ose autorizimeve publike.
