Ndërlidhjet

Fondi i Kursimeve siguron se pensionet s'do të ndikohen nga rënia e investimeve


Ilustrim

Fondi i Kursimeve Pensionale i Kosovës ka siguruar kontribuesit e moshës se ka marrë masa që pensionet e vitit 2020, të mos ndikohen nga rënia e investimeve, si pasojë e pandemisë së koronavirusit.

Përmes një komunikate për media, Fondi ka thënë se pensionet janë të mbrojtura ndaj çfarëdo lëvizjeje negative gjatë këtij viti.

Fondi ka shfaqur shpresën se rënia aktuale e investimeve në të “është e përkohshme” dhe se “do të rikuperohet gjatë pjesës tjetër të këtij viti, eventualisht vitin në vijim”.

Pandemia e koronavirusit ka prekur investimet në gjithë botën.

Më 1 prill, është bërë e ditur se tregjet e aksioneve në botë kanë pësuar humbje historike në tre muajt e parë të këtij viti.

Indeksi Dow Jones, një tregues kyç i tregut të aksioneve në SHBA, ka rënë për 23 për qind – çfarë ka qenë rënia më e madhe në një tremujor që nga viti 1987.

Fondi i Kursimeve Pensionale i Kosovës është institucion publik i pavarur dhe jo për profit, i themeluar nga Kuvendi i Republikës së Kosovës.

Ky institucion është krijuar sipas modelit të kontributeve pensionale të definuara, që nënkupton se secili kontribues kursen për pension në një llogari personale.

XS
SM
MD
LG