Ndërlidhjet

Serbia ngrit aktakuzë për krime lufte ndaj Nezir Mehmetajt


Ilustrim.
Ilustrim.

Prokuroria e Serbisë ka ngritur aktakuzë për krime lufte, kundër shtetasit të Kosovës, Nezir Mehmetaj, konfirmoi për Radion Evropa e Lirë, vëllai i të akuzuarit, Valon Mehmetaj.

“Jemi në dijeni për aktakuzë, por nuk e dimë përmbajtjen e aktakuzës. Nesër apo pasnesër pritet të marrin dokumentin e plotë”, tha Valon Mehmetaj për REL, duke shtuar se lidhur me këtë familja është informuar nga avokati mbrojtës Sead Spahoviq.

“Rastin e kemi përjetuar rëndë sepse kemi pritur që ai të lirohet tash, pas gjashtë muajsh paraburgimi. Fatkeqësisht aktakuza u ngrit dhe iu vazhdua paraburgimi”, shtoi Valon Mehmetaj.

Prokuroria për krime lufte në Beograd, më herët ka konfirmuar për REL se ka ngritur aktakuzë ndaj N.M për shkak të dyshimit të bazuar se ka kryer veprën penale “krime lufte kundër popullatës civile” gjatë periudhës qershor-korrik të vitit 1999.

Krimet supozohet se janë kryer në fshatin Rudicë, Komuna e Klinës, ka konfirmuar për Radion Evropa e Lirë, Prokuroria në Beograd.

Së bashku me aktakuzën është edhe kërkesa për zgjatje të paraburgimit të të pandehurit N.M, i cili më 3 janar është arrestuar në pikëkalimin kufitar në Merdare dhe që atëherë është në paraburgim.

Avokati mbrojtës i Mehmetajt, Sead Spahoviq, tha për Radion Evropa e Lirë se afati ligjor ka skaduar sot (1 korrik) deri kur duhej që Prokuroria të ngriste ndonjë aktakuzë apo ta lironte Mehmetajn. Avokati po ashtu theksoi se Mehmetaj ka hedhur poshtë të gjitha pretendimet e Prokurorisë, që janë paraqitur në këtë aktakuzë për krime lufte.

Zëdhënësi i Prokurorisë për krime lufte në Serbi, Vasillje Seratiq ka konfirmuar për Radion Evropa e Lirë më 9 janar se shtetasit të Kosovës, Nezir Mehmetaj i ishte caktuar paraburgimi prej 30 ditësh, nën dyshimet për krime lufte në fshatin Rudicë.

Në përgjigjen me shkrim nga Prokuroria e Beogradit dhënë për Radion Evropa e Lirë, nuk përmenden detajet se për cilin krim bëhet fjalë dhe për çka konkretisht akuzohet Mehmetaj.

Avokati i Mehmetaj, Sead Spahoviq ka thënë për Radion Evropa e Lirë se Mehmetaj po akuzohet për vepra të kryera pas qershorit, 1999, kur lufta kishte mbaruar dhe se akuzat ndaj tij nuk mund të lidhen me krime lufte.
Ai ka shtuar se nuk ka asnjë dëshmi në shkresat e prokurorisë ndaj lëndës për Mehmetajn se klienti i tij ka qenë i përfshirë në ndonjë vepër që përbën krime lufte.

Ndërkohë, Ministrja e Jashtme e Kosovës, Meliza Haradinaj ka kërkuar lirimin e menjëhershëm të Mehmetajt.

Përmes një postimi në llogarinë e saj në Twitter ka thënë se ai është ndalur në mënyrë të paligjshme për gjashtë muaj në Serbi.

“Serbia është duke shkelur ligjin ndërkombëtar duke arrestuar qytetarë të Kosovës pa bazë, por vetëm për shkak të etnisë”.

Sipas ministres Haradinaj, veprimet e tilla të Serbisë kundër Kosovës dhe qytetarëve të saj dëmtojnë përpjekjet për të arritur marrëveshje në mes të të dyja shteteve si dhe nuk i kontribuojnë paqes dhe stabilitetit në rajon.

MPJ kërkon lirimin e shtetasit të Kosovës nga autoritetet serbe

XS
SM
MD
LG