Ndërlidhjet

Vdes agjenti i dyfishtë i Luftës së Ftohtë, George Blake


George Blake, 2006.
George Blake, 2006.

Agjenti i dyfishtë i epokës së Luftës së Ftohtë, George Blake, ka vdekur në Moskë në moshën 98-vjeçare, raportuan autoritetet ruse.

“Oficeri legjendar i inteligjencës, George Blake, ka vdekur sot”, tha një zëdhënës i Agjencisë së Inteligjencës së Huaj në Rusi, SVR.

Blake “e ka dashur sinqerisht vendin tonë dhe ka admiruar arritjet e popullit tonë gjatë Luftës së Dytë Botërore”, tha ai, citon agjencia e lajmeve TASS.

Presidenti i Rusisë, Vladimir Putin, shprehu “ngushëllimet e tij të përzemërta”, duke thënë se Blake ka qenë “një profesionist i shkëlqyeshëm me një vitalitet dhe guxim të veçantë”.

“Në vitet e shërbimit të tij të vështirë dhe intensiv, ai ka dhënë një kontribut me të vërtetë të paçmuar në sigurimin e barazisë strategjike dhe ruajtjen e paqes në planet”, tha Putin.

Blake ka lindur në Holandë në vitin 1922 dhe mbiemri i tij origjinal familjar ishte Behar.

Ai është rritur në Roterdam dhe në Egjipt, përpara se të ndiqte Universitetin e Kembrixhit, për të studiuar rusishten.

Gjatë Luftës së Dytë Botërore, ai ka shërbyer në rezistencën holandeze, edhe pse ka qenë i ri.

Në vitin 1944 është bashkuar me Marinën Mbretërore të Britanisë, ndërsa më vonë është rekrutuar nga Shërbimi Sekret i Inteligjencës, MI6.

Blake është dërguar në Seul dhe është kapur nga forcat e Koresë së Veriut në vitin 1950. Gjatë robërisë së tij trevjeçare, Blake është bërë komunist dhe është rekrutuar nga shërbimi sovjetik i inteligjencës, KGB.

Gjatë nëntë vjetëve, Blake besohet se ka ekspozuar rreth 40 agjentë të MI6-ës te KGB-ja, duke shkaktuar përçarje të mëdha në aktivitetet e MI6-ës në Evropën lindore.

XS
SM
MD
LG