Ndërlidhjet

Twitter dhe Facebook mbyllin përkohësisht llogaritë e Trumpit


Presidenti në largim i SHBA-së, Donald Trump.
Presidenti në largim i SHBA-së, Donald Trump.

Twitter tha se ka mbyllur për 12 orë llogarinë e presidentit në largim të Shtetetve të Bashkuara, Donald Trump, për shkak të disa postimeve të tij në lidhje me zgjedhjet.

“Si rezultat i situatës së paparë dhe dhunës së vazhdueshme në Uashington, kemi kërkuar heqjen e tre postimeve nga [llogaria] @realDonaldTrump - të cilat janë bërë gjatë ditës së sotme - për shkak të shkeljeve të përsëritura dhe të rënda të politikës sonë të Integritetit Civil”, tha platforma sociale.

Nëse Trump nuk i heq tre postimet, llogaria do të mbetet e mbyllur.

Twitter gjithashtu paralajmëroi se shkeljet e ardhshme të integritetit ose politikave të kërcënimit “do të rezultojnë me pezullim të përhershëm të llogarisë @realDonaldTrump”.

Ndërkohë, Facebook ndaloi llogarinë e Trumpit për 24 orë. YouTube gjithashtu hoqi një video. Facebook tha: "Ne e hoqëm atë pasi besojmë se ajo kontribuon, në vend që të zvogëlojë rrezikun e dhunës së vazhdueshme".

Të mërkurën, mbështetës të dhunshëm të Trumpit sulmuan ndërtesën e Kongresit amerikan, e cila po mbante një seancë për konfirmimin e presidentit të zgjedhur, Joe Biden.

Mesazhi i Trumpit për protestuesit, derisa ata sulmuan Kongresin, u hoq nga Facebook, YouTube dhe Twitter.

Trump u bëri thirrje mbështetësve që të shkojnë në shtëpi, por gjithashtu përsëriti pretendimet e pabazuara për mashtrime në zgjedhje.

Facebook tha: “Ne e hoqëm atë, sepse besojmë se kontribuon në dhunën e vazhdueshme dhe nuk e zvogëlon rrezikun”.

YouTube tha se e hoqi videon sepse "shkelte politikat për përhapjen e mashtrimit zgjedhor".

Twitter fillimisht nuk e hoqi videon, por vetëm mundësitë për ta shpërndarë, pëlqyer ose komentuar.

Megjithatë, më vonë e hoqi.

XS
SM
MD
LG