Ndërlidhjet

Kongresi konfirmon Joe Biden si president të SHBA-së


Presidenti i zgjedhur amerikan, Joe Biden.

Kongresi amerikan ka certifikuar Joe Biden dhe Kamala Harris si presidentin dhe nënpresidenten e ardhshme të SHBA-së.

Ligjvënësit konfirmuan se Biden fitoi 306 vota të Kolegjit Zgjedhor, krahasuar me 232 vota për presidentin aktual, Donald Trump.

Votat elektorale u miratuan pasi Senati dhe Dhoma e Përfaqësuesve refuzuan kundërshtimet e republikanëve ndaj votave në shtetet e Pensilvanisë dhe Arizonës.

Certifikimi i votave të Kolegjit Elektoral nga ana e Kongresit amerikan është hapi i fundit në procesin zgjedhor, para inagurimit të presidentin e zgjedhur, Joe Biden dhe nënpresidentes së zgjedhur, Kamala Harris më 20 janar.

Seanca e përbashkët e Dhomës së Përfaqësusve dhe Senatit. Nënpresidenti amerikan, Mike Pence dhe kryesuesja e Dhomës së Përfaqësuesve, Nancy Pelosi.
Seanca e përbashkët e Dhomës së Përfaqësusve dhe Senatit. Nënpresidenti amerikan, Mike Pence dhe kryesuesja e Dhomës së Përfaqësuesve, Nancy Pelosi.

Presidenti aktual, Donald Trump tha se "do të ketë një tranzicion të rregullt" të pushtetit.

"Edhe pse nuk jam plotësisht dakord me rezultatin e zgjedhjeve, megjithatë do të ketë një tranzicion të rregullt në 20 janar", tha Trump në një deklaratë të postuar në Twitter nga zëdhënësi i Shtëpisë së Bardhë, Dan Scavino.

Presidenti Trump e ka kundërshtuar fitoren e demokratit Biden në zgjedhjet e 3 nëntorit, 2020. Por, një sërë padish janë hedhur poshtë nga gjykatat e shteteve dhe ajo Supreme. Trump ka bërë akuza të pabazuara për mashtrime zgjedhore.

Ai u tha mbështetësve të tij të bënin presion tek zyrtarët e tyre të zgjedhur për të refuzuar rezultatet, duke i nxitur ata "të luftonin".

Katër viktima nga sulmi në Kongres

Seanca e Kongresit vazhdoi pas rreth katër orësh trazira, pasi protestuesit e dhunshëm që mbështesin presidentin aktual të SHBA-së, Donald Trump, sulmuan ndërtesën e Kongresit duke hyrë brenda.

Policia e Uashingtonit thotë se katër njerëz kanë vdekur gjatë sulmit në ndërtesën e Kongresit. Përveç një gruaje të qëlluar nga policia, tre të tjerë vdiqën si rezultat i "urgjencave mjekësore". Deri më tani, më shumë se 52 persona janë arrestuar - 47 prej tyre për shkelje të rregullave të izolimit.

Mediat amerikane raportuan se gruaja që u qëllua dhe u vra gjatë sulmit në Kongres ishte një veterane e Forcave Ajrore të SHBA-së. Ajo mendohet të jetë qëlluar pasi hyri në ndërtesë së bashku me protestuesit e tjerë.

Garda Kombëtare u mobilizua për t'iu ofruar mbështetje zyrtarëve federalë të zbatimit të ligjit.

Kur ligjvënësit iu rikthyen seancës, qindra mbështetës të Trumpit ishin ende në rrugët e Uashingtonit, përkundër pranisë së madhe të policisë dhe shtetrrethimit të shpallur nga ora 6 e pasdites.

“Për ata që bënë kërdi në Kongresin tonë sot: Ju nuk keni fituar. Le t’i kthehemi punës”, tha nënpresidenti Mike Pence.

“Ne do ta certifikojmë fituesin e zgjedhjeve të vitit 2020”, shtoi udhëheqësi republikan i Senatit, Mitch McConnell.

Amendamenti i 12-të; Ligji 137-vjeçar

Procedurat për mënyrën se si mbahen zgjedhjet presidenciale përshkruhen në Kushtetutën e SHBA-së, në një amendament pasues dhe në një ligj të vitit 1887.

Anëtarët e një organi politik unik, të quajtur Kolegji Zgjedhor, zgjedhin zyrtarisht presidentin, duke hedhur votat që pasqyrojnë rezultatet e certifikuara të votave të popullit në secilin shtet dhe në Distriktin e Kolumbias.

Policia hedh gaz lotsjellës në drejtim të protestuesve në Uashington
Ju lutem të prisni

No media source currently available

0:00 0:01:17 0:00

Vota e Kolegjit Zgjedhor certifikohet më pas nga Kongresi rreth dy javë përpara inaugurimit presidencial. Dita e inaugurimit, që është 20 janari, është e përcaktuar me Amendamentin e 12-të të Kushtetutës amerikane.

Seanca tradicionalisht udhëhiqet nga zëvendësi i presidentit që është ende në detyrë - në këtë rast Mike Pence.

Sipas rregullave, nënkryetari supozohet të ketë jo më shumë se një rol ceremonial - përfshirë hapjen e zarfeve që kanë votat e Kolegjit Zgjedhor dhe shpalljen e atyre rezultateve.

Por, kësaj rradhe kjo seancë ishte larg asaj që mund të quhet ceremoniale.

XS
SM
MD
LG