Ndërlidhjet

Ekipi i OBSH-së inspekton një laborator të Vuhanit


Një anëtar i stafit mjekësor brenda një pavioni izolimi në Spitalin e Kryqit të Kuq në Vuhan në provincën qendrore të Kinës Hubei më 10 mars, 2020.

Ekspertët e Organizatës Botërore të Shëndetësisë (OBSH) e kanë vizituar një laborator në Vuhan të Kinës për të cilin ka pasur pretendime se nga aty ka dalë koronavirusit i ri.

Inspektimi i institutit të virologjisë Vuhan, në të cilin kryhen hulumtime mbi sëmundjet më të rrezikshme në botë, do të jetë një nga ndalesat në hetimet për origjinën e pandemisë COVID-19.

Misionin e ekspertëve të OBSH, Kina e kishte vonuar gjatë gjithë vitit të parë të pandëmisë. Ky ekip e ka për detyrë të shpjegojë se si kërceu virusi nga kafshët te njerëzit.

Por, ka pikëpyetje për faktet që mund të gjejnë ata, pasi ka kaluar shumë kohë që nga fillimi i pandemisë.

"Ne po presim me padurim të takohemi me të gjithë njerëzit kryesorë këtu dhe të bëjmë të gjitha pyetjet e rëndësishme që duhet të bëhen", tha zoologu dhe anëtari i ekipit Peter Daszak, sipas një video të transmetuesit japonez TBS.

Shumica e shkencëtarëve mendojnë se COVID-19 - i cili u shfaq për herë të parë në Vuhan dhe që ka vrarë më shumë se dy milionë njerëz në të gjithë botën - ka origjinën nga lakuriqët e natës dhe mund t'u transmetohej njerëzve përmes një gjitari tjetër.

Ekspertët e OBSH-së qëndruan brenda institutit për gati katër orë, përpara se të largoheshin pa u ndalur për të folur me mediat që prisnin jashtë.

Kishte spekulime në fillim të pandemisë që virusi mund të kishte dalë aksidentalisht nga laboratori i biosigurisë në Vuhan, megjithëse nuk kishte prova për të mbështetur atë teori.

Kina e ka mohuar atë mundësi dhe ka folur për teori të pabazuara se virusi mund të ketë origjinën diku tjetër ose është sjellë në vend me importet e prodhimeve të detit të ngrirë. Teoritë janë refuzuar nga shkencëtarët ndërkombëtarë.

XS
SM
MD
LG