Ndërlidhjet

Zyrtari amerikan: Raketat ruse kaluan në Poloni, vranë dy persona


Pasojat e sulmit me raketa në qendër të Vinytsias në Ukrainë. 15 korrik 2022.
Pasojat e sulmit me raketa në qendër të Vinytsias në Ukrainë. 15 korrik 2022.

Një zyrtar i lartë i inteligjencës amerikane tha se raketat ruse kaluan edhe në Poloni dhe vranë dy persona, raporton AP.

Mediat polake raportuan se dy persona u vranë në një fshat polak, i cili gjendet pranë kufirit me Ukrainën.

Raportimet e mediave i konfirmoi edhe zëdhënësi i Qeverisë polake, Piotr Mueller, por pa dhënë detaje nëse ato ishin nga Rusia.

Ai tha se Polonia ka rritur gatishmërinë ushtarake dhe se po verifikon nëse duhet të aktivizohet Neni 5 i NATO-s.

Polonia është shtet anëtar i aleancës ushtarake.

Sipas Nenit 5 të NATO-s, të gjitha vendet anëtare janë të obliguara të ndihmojnë një vend tjetër anëtar, sovraniteti dhe integriteti territorial i të cilit mund të kërcënohet.

“Sulmi ushtarak kundër një anëtari konsiderohet si sulm ndaj të gjithëve”, thotë Neni 5 i traktatit.

Shefi i NATO-s, Jens Stoltenberg, tha se ka folur me presidentin polak, Andrzej Duda, për shpërthimin.

"NATO po monitoron situatën dhe aleatët po konsultohen nga afër. Është e rëndësishme që të gjitha faktet të vërtetohen", ka shkruar ai në Twitter.

Shtëpia e Bardhë, Pentagoni dhe Departamenti amerikan i Shtetit thanë se nuk mund të konfirmojnë atë që ka ndodhur dhe se po punojnë me Qeverinë polake për të mbledhur më shumë informacione.

Presidenti ukrainas, Volodymyr Zelensky, ka akuzuar Rusinë për sulm të qëllimshëm ndaj Polonisë.

"Ky është një sulm raketor rus ndaj sigurisë kolektive", tha ai.

"Ky është një përshkallëzim shumë domethënës. Ne duhet të veprojmë", ka shkruar ai në Telegram.

Ministria ruse e Mbrojtjes mohoi se raketat e saj kaluan në Poloni, duke i quajtur raportimet një "provokim i qëllimshëm".

Mediat shtetërore ruse kanë lënë të kuptohet se ishin në fakt raketat ukrainase, dhe jo ruse, ato që goditën territorin polak. Këto pretendime janë të pabazuara.

Reagimet ndërkombëtare

Derisa Këshilli i Sigurisë Kombëtare po mban mbledhje urgjente, Qeveria e Polonisë po merr më shumë shprehje mbështetjeje nga aleatët e NATO-s.

Ministrja e Jashtme gjermane, Annalena Baerbock, tha se po e monitorojmë nga afër situatën dhe se janë në kontakt me "miqtë tanë polakë dhe aleatët e NATO-s".

Kryeministri holandez, Mark Rutte, tha se "është e rëndësishme tani të përcaktohet se çfarë ka ndodhur saktësisht".

Presidenti francez, Emmanuel Macron, tha gjithashtu se është në kontakt me Poloninë dhe se për këtë beson se do të diskutohet nesër në samitin e G20-ës.

Presidenti i Këshillit Evropian, Charles Michel, ka shkruar në Twitter se është i tronditur nga lajmi se një raketë ka vrarë njerëz në territorin polak.

"Ngushëllimet e mia për familjet. Ne qëndrojmë me Poloninë. Unë jam në kontakt me autoritetet polake, anëtarët e Këshillit Evropian dhe aleatët e tjerë”, ka thënë ai.

Presidentja e Komisionit Evropian, Ursula von der Leyen, tha se është "e alarmuar" nga raportimet që vijnë nga Polonia.

Ka reaguar ministria e Jashtme e Estonisë, ku ka thënë se është e gatshme të mbrojë çdo pëllëmbë të territorit të NATO-s.

"Lajmet e fundit nga Polonia janë më shqetësuese. Ne jemi duke u konsultuar ngushtë me Poloninë dhe aleatët e tjerë. Estonia është e gatshme të mbrojë çdo pëllëmbë të territorit të NATO-s. Ne jemi në solidaritet të plotë me aleatin tonë të ngushtë Poloninë”, thuhet në postimin e kësaj ministrie në Twitter.

Edhe presidenti i Lituanisë, Gitanas Nauseda, tha se duhet mbrojtur çdo pëllëmbë të territorit të NATO-s dhe se vendi i tij qëndron në solidarite të plotë me Poloninë.

Kryeministri çek, Petr Fiala, ka thënë se nëse Polonia konfirmon se raketat kanë goditur edhe territorin e saj, ky do të jetë një përshkallëzim i mëtejshëm nga Rusia.

"Ne qëndrojmë fort pas aleatit tonë në BE dhe NATO", ka shkruar ai në Twitter.

Më 15 nëntor, Rusia ka sulmuar me raketa Kievin dhe disa qytete tjera ukrainase, ku të paktën një person është vrarë.

Ky duket të jetë një sulm mbarëkombëtar, pasi sulme të njëjta po raportohen edhe në Zaporizhja Mykolaiv, Chernihiv dhe vende tjera.

Presidenti ukrainas, Volodymyr Zelensky, tha se 85 raketa janë lëshuar kundër Ukrainës të martën, dhe 20 të tjera pritet ta godasin vendin.

Ky sulm po ndodhë derisa liderët botërorë janë mbledhur në Bali të Indonezisë në samitin e G20-tës, apo grupit të vendeve më të industrializuara, ku kanë dënuar pushtimin rus të Ukrainës.

Shtetet e Bashkuara i kanë dënuar ashpër këto sulme.

Javën e kaluar Moska ka tërhequr trupat e saj nga qyteti jugor Herson - një nga sukseset më të mëdha të Ukrainës në luftën e saj kundër pushtimit rus.

Në të kaluarën, kur Rusia ka pësuar humbje në terren, ajo ka sulmuar përmes ajrit.

Pushtimi rus i Ukrainës ka nisur më 24 shkurt.

XS
SM
MD
LG