Daçiq paralajmëron për "destabilizim të rajonit"
Ministri i Punëve të Jashtme i Serbisë, Ivica Daçiq, tha se “aktet e njëanshme” të autoriteteve të Kosovës rrezikojnë ta destabilizojnë rajonin dhe u bëri thirrje përfaqësuesve të bashkësisë ndërkombëtare që t'i marrin seriozisht ato.
Deklarata e Daçiqit vjen pasi grupe serbësh në Zveçan, Leposaviq dhe Zubin Potok u mblodhën të hënën për të kundërshtuar edhe një herë kryetarët e rinj të këtyre komunave në veri të Kosovës - që të gjithë shqiptarë - të zgjedhur në zgjedhjet e jashtëzakonshme të 23 prillit.
“Prishtina është kërcënimi më i madh për paqen dhe stabilitetin rajonal për momentin”, tha Daçiq.
Video nga situata në veri të Kosovës:
AGK raporton për tentim-sulme dhe vandalizime në veri
Asociacioni i Gazetarëve të Kosovës raportoi për tentim-sulme kundër disa gazetarëve në veri të Kosovës, ku grupe serbësh lokalë janë duke protestuar sot kundër kryetarëve të rinj shqiptarë të komunave Zveçan, Zubin Potok dhe Leposaviq.
Në postimet e bëra në mediat sociale shihen disa makina të mediave të vandalizuara.
Protestues të maskuar në Zveçan
Përshëndetje për të gjithë ju që sapo na jeni bashkuar:
- Në komunat veriore Zveçan, Zubin Potok dhe Leposaviq, grupe të qytetarëve serbë janë duke vazhduar protestat kundër kryetarëve të rinj shqiptarë. Situatë më e tensionuar raportohet në Zveçan, ku shihen edhe protestues të maskuar.
- Përfaqësuesit politikë të serbëve kërkuan nga misioni paqeruajtës KFOR dhe ambasadorët e huaj që të mos e lejojnë hyrjen e kryetarëve në objektet komunale. Ata kërkuan edhe tërheqjen e njësiteve speciale të Policisë së Kosovës nga veriu i banuar me shumicë serbe. Përgjigje në këto kërkesa nuk ka ende.
- Ambasadori amerikan në Prishtinë, Jeffrey Hovenier, priti në takim kryetarët e komunave të Zubin Potokut dhe Zveçanit. Hovenier tha se “është e rëndësishme që të shmangen situatat në të cilat zyrtarët publikë hyjnë në ndërtesat publike përmes përdorimit të forcës”.
- Derisa nga Qeveria e Kosovës nuk ka ndonjë reagim, në Serbi, ministri i Mbrojtjes, Millosh Vuçeviq, tha se deri në orën 14:00 do të përfundojë dislokimi i plotë i njësive të Forcave të Armatosura të Serbisë, në përputhje me urdhrin e presidentit Aleksandar Vuçiq për rritjen e gatishmërisë luftarake.