Tre ushtarë të KFOR-it, “të plagosur me armë zjarri”
Tre ushtarë hungarezë të KFOR-it janë plagosur nga përdorimi “i armëve të zjarrit” gjatë përplasjeve me protestuesit serbë, të hënën në Zveçan, bëri të ditur misioni paqeruajtës i NATO-s.
Në njoftimin dërguar mediave thuhet se tre ushtarët “nuk kanë plagë vdekjeprurëse”.
Në përleshjet e një dite më parë u plagosën gjithsej 30 ushtarë të KFOR-it: 19 hungarezë dhe 11 italianë.
KFOR-i tha se dhuna e së hënës në Zveçan ishte e “paprovokuar”.
Përpjekje për të organizuar një takim mes Kurtit e Vuçiqit
I dërguari i posaçëm i BE-së për dialogun mes Kosovës dhe Serbisë, Mirosllav Lajçak, është duke bërë përpjekje të organizojë një takim ‘ad hoc’ mes kryeministrit të Kosovës, Albin Kurti, dhe presidentit të Serbisë, Aleksandar Vuçiq, në Bratisllavë, mëson Radio Evropa e Lirë nga burimet diplomatike në Bruksel.
Sipas tyre, “kjo është ende një ide dhe një përpjekje” dhe “nuk ka konfirmime nga palët nëse janë apo jo të gatshme për një takim të tillë”.
Bratisllava është përmendur si vend i mundshëm për takim, pasi dy udhëheqësit janë të ftuar të marrin pjesë në një konferencë për sigurinë globale që po zhvillohet në këtë vend.
Radio Evropa e Lirë po përpiqet të marrë koment edhe nga Qeveria e Kurtit.
Vazhdoni të na ndiqni!
Vuçiq kërkon tërheqjen e kryetarëve shqiptarë nga veriu
Presidenti i Serbisë, Aleksandar Vuçiq, kërkoi tërheqjen e njësive speciale të Policisë së Kosovës nga veriu i Kosovës, ashtu si edhe të kryetarëve të komunave me kombësi shqiptare.
Vuçiq i bëri komentet në takim me ambasadorët e vendeve të Quint-it: Shteteve të Bashkuara, Mbretërisë së Bashkuar, Francës, Gjermanisë dhe Italisë, njofton kabineti i tij.
“Shpresoj se do të mund ta bindni [kryeministrin e Kosovës, Albin] Kurti që t’i tërheqë forcat e tij dhe kryetarët personalë nga veriu”, tha Vuçiq.
Sipas komunikatës që iu dërgua mediave, Vuçiq tha, po ashtu, se Serbia do ta vazhdojë komunikimin me përfaqësuesit e misionit të NATO-s në Kosovë, KFOR, me “besimin më të mirë për të ruajtur paqen dhe stabilitetin”.
“Presidenti shprehu keqardhjen e tij për ushtarët e lënduar të KFOR-it, por theksoi se një numër shumë më i madh i serbëve u plagosën, se kundër tyre u përdorën armë zjarri dhe forcë e madhe fizike, edhe pse ata që në fillim bënë rezistencë të padhunshme”, thuhet në deklaratë.
Tridhjetë ushtarë të KFOR-it u plagosën të hënën në Zveçan - komunë me shumicë serbe në veri të Kosovës - ku protestues serbë kundërshtuan kryetarin e ri shqiptar.
Dhjetëra të plagosur u raportuan edhe në anën e protestuesve.
Ata nuk iu bindën kërkesës paraprake të KFOR-it për t’u shpërndarë.
Policia heton incidentet në veri
Policia e Kosovës tha se po heton të gjitha rastet që ndodhën të hënën në veri të Kosovës, gjatë protestës së serbëve në Zveçan, Leposaviq dhe Zubin Potok.
Sipas Policisë së Kosovës, protestues, individë dhe grupe kriminale, "me dhunën ekstreme të shfaqur", kanë bërë që "situata në aspektin e sigurisë në veri të vendit të përshkallëzohet dhe të degradojë deri në rrezikim të jetës së njerëzve, përfshirë jetën e zyrtarëve të institucioneve të sigurisë".
Për më shumë hollësi, lexoni këtu.