Borrell do të takojë Vuçiqin në Kishinjev
Shefi i politikës së jashtme të BE-së, Joseph Borrell, do të udhëtojë për në Kishinjev të Moldavisë, ku do të takohet me presidentin e Serbisë, Aleksandar Vuçiq, merr vesh jozyrtarisht Radio Evropa e Lirë.
Sipas burimeve, në ditët në vazhdim, në Prishtinë dhe Beograd do të qëndrojë i dërguari i BE-së për dialogun Kosovë-Serbi, Mirosllav Lajçak.
Të enjten në Kishinjev mbahet samiti i dytë i Komunitetit Politik Evropian, i cili është lansuar në tetor të vitit 2022 në Pragë, me iniciativë të presidentit të Francës, Emmanuel Macron.
Shënim: Në versionin e parë të këtij lajmi është thënë se Lajçak do të takojë Vuçiqin.
Kurti për REL-in: SHBA-ja, mike e pazëvendësueshme për Kosovën
Kryeministri i Kosovës, Albin Kurti, ka komentuar sanksionet e Shteteve të Bashkuara të Amerikës ndaj Kosovës, si pasojë e situatës së krijuar në veri të vendit.
Në një prononcim dhënë Radios Evropa e Lirë, pas një diskutimi që e pati në një forum të organizuar në Bratisllavë të Sllokavisë, ai e ka quajtur fatkeqësi përjashtimin e Kosovës nga stërvitja ndërkombëtare ushtarake "Defender Europe 23".
Bisedën e plotë mund ta lexoni këtu.
Ministri i Mbrojtjes i Serbisë arrin në garnizonin e Rashkës
Ministri serb i Mbrojtjes, Millosh Vuçeviq, arriti në garnizonin e Rashkës, afër kufirit me Kosovën, ku është vendosur një pjesë e ushtrisë së Serbisë.
Ministria e Mbrojtjes e këtij vendi njoftoi se Vuçeviq do të diskutojë për situatën aktuale të sigurisë me oficerë të lartë të Forcave të Armatosura të Serbisë.
Me urdhër të presidentit serb, Aleksandar Vuçiq, ushtria serbe është në nivelin më të lartë të gatishmërisë luftarake që nga 26 maji.
Vuçiq e mori këtë vendim pas rritjes së tensioneve në veri të Kosovës.
Kurti për REL-in: Pezullimi nga “Defender Europe” është fatkeqësi
Kryeministri i Kosovës, Albin Kurti, tha në një bisedë me Radion Evropa e Lirë se pezullimi i Kosovës nga stërvitjet ushtarake "Defender Europe" është një fatkeqësi.
"Më lejoni të theksoj se SHBA-ja është mike, partnere e aleate e pazëvendësueshme për sigurinë dhe mbrojtjen tonë, për demokracinë dhe zhvillimin tonë”, tha Kurti.
Kujtojmë se SHBA-ja, të martën, e përjashtoi Kosovën nga pjesëmarrja në "Defender Europe" - një stërvitje ushtarake e udhëhequr nga Amerika në Evropë - me arsyetimin se Kosova i injoroi këshillat e saj për të shmangur rritjen e tensioneve në veriun e banuar me shumicë serbe.