Mirëmëngjesi nga Radio Evropa e Lirë,
Na ndiqni edhe sot për zhvillimet më të reja në veri të Kosovës - minutë pas minute.
Të nderuar lexues,
Këtu po e përmbyllim mbulimin direkt të ngjarjeve në veri të Kosovës.
Do të rikthehemi të premten në mëngjes.
Faleminderit që ishit me ne!
Kurti: Jam i përkushtuar të punoj me SHBA-në për ulje të tensioneve
Kryeministri i Kosovës, Albin Kurti, ka njoftuar se ka zhvilluar një bisedë telefonike me zëvendëskëshilltarin për siguri kombëtare të SHBA-së, Jon Finer.
Kurti tha se është i përkushtuar që të punojë me SHBA-në në uljen e tensioneve në pjesën veriore.
Mirëpo, që të ndodhë kjo, sipas Kurtit, duhet t’i jepet fund menjëherë dhunës së shkaktuar nga “turmat e sponsorizuara nga Beogradi kundër zyrtarëve të sigurisë” deri në zgjedhjet e reja në ato komuna.
Borrell prezanton tri kërkesa për Kosovën dhe Serbinë
Përfaqësuesi i Lartë i Bashkimit Evropian për Politikë të Jashtme, Josep Borrell, ka prezantuar tri kërkesa të qarta për Kosovën dhe Serbinë.
Borrell ka thënë se kërkesat janë si vijon:
- Zgjedhje t reja lokale [në komunat veriore].
- Sigurimi i pjesëmarrjes së serbëve të Kosovës [në zgjedhje].
- Fillimi i punës për themelimin e Asociacionit të komunave me shumicë serbe me dialogun e lehtësuar nga BE-ja.
Borrell ka thënë se dështimi për ta bërë këtë do të ketë pasoja të rënda për marrëdhëniet e Kosovës dhe Serbisë më Bashkimin Evropian.
Këto kërkesa Borrell i ka prezantuar pak orë pas takimit që u zhvillua në mes të tij, presidentit francez, Emmanuel Macron, kancelarit gjerman, Olaf Schloz, presidentes së Kosovës, Vjosa Osmani, si dhe presidentit të Serbisë, Aleksandar Vuçiq.