Ndërlidhjet

Biden synon që gjysma e veturave të reja në SHBA të jenë elektrike deri më 2030


Makina elektrike të kompanisë Tesla, duke rimbushur bateritë në Berlin.
Makina elektrike të kompanisë Tesla, duke rimbushur bateritë në Berlin.

Presidenti amerikan, Joe Biden, ka nënshkruar një urdhër ekzekutiv që parasheh se gjysma e veturave të reja të shitura në SHBA, të jenë elektrike deri më 2030.

Biden ka bërë të ditur këtë vendim më 5 gusht nga Shtëpia e Bardhë, bashkë me shefat ekzekutivë të prodhuesve të mëdhenj të makinave në SHBA.

Si prodhuesit amerikanë, ashtu edhe ata të huaj, kanë thënë se përmbushja e këtij synimi, që nuk është i detyrueshën, kërkon ndarjen e fondeve qeveritare në vlerë të miliarda dollarëve.

Sipas tyre, aty duhet të përfshihen stimuj të tillë si subvencionet ndaj konsumatorëve, rrjetet e rimbushjes së baterive dhe investimet në kërkim dhe zhvillimin.

Ky vendim është pjesë e planit të Bidenit për të luftuar ndryshimet klimatike, në këtë rast përmes shënjestrimit të emetimeve nga makinat dhe kamionët.

Ai ka marrë këtë vendim edhe për t’i bërë konkurrencë Kinës dhe shteteve tjera që kanë investruar në makina elektrike.

Biden i ka quajtur këto lloj makinash si e ardhmja e industrisë së automobilizmit.

“Do të jenë elektrike dhe ska kthim mbrapa. Pyetja është nëse ne do të udhëheqim apo do të mbesim mbrapa”, ka thënë ai.

Administrata e Bidenit ka propozuar edhe emetime standarde për makinat e reja, të cilat besohet se do të zvogëlonin emetimet e karbonit deri më 2026, duke nisur nga modelet e reja të makinave që do të prezantohen më 2023.

XS
SM
MD
LG