Bisedimet mes Shteteve të Bashkuara dhe Rusisë për një armëpushim të pjesshëm në Ukrainë, ishin “intensive” por të dobishme, tha një anëtar i ekipit negociues të Rusisë.
“Ne biseduam për gjithçka, ishte një dialog intensiv, jo i lehtë, por shumë i dobishëm për ne dhe për amerikanët”, tha të martën Grigory Karasin për agjencinë shtetërore të lajmeve, TASS.
“Kemi shtjelluar shumë probleme. Natyrisht, jo gjithçka u vendos, nuk u pajtuam për gjithçka, por fakti që një bisedë e tillë u zhvillua, më duket shumë e dobishme”, shtoi ai.
Karasin, i cili për kohë të gjatë ishte zëvendësministër i Jashtëm i Rusisë, tha se bisedimet SHBA-Rusi do të vazhdojnë dhe se Kombet e Bashkuara dhe vendet e tjera do të përfshihen në to. Ai nuk tha hollësi rreth kësaj.
Ai i bëri këto komente një ditë takimit 12-orësh mes dy vendeve në Arabinë Saudite, vendin ku po zhvillohen bisedimet.
Amerikanët u takuan me zyrtarë ukrainas atje më 23 mars, dhe AFP dhe Bloomberg News cituan burime anonime duke thënë se ata po zhvillonin sërish bisedime më 25 mars.
Derisa bisedimet po zhvilloheshin në Riad, Rusia e sulmoi me raketa qytetin Sumi të Ukrainës, duke plagosur më shumë se 90 njerëz, përfshirë 23 fëmijë.
Presidenti i Ukrainës, Volodymyr Zelensky, e dënoi sulmin, duke thënë se ky është shembulli më i freskët i "humbjeve, dhimbjes dhe shkatërrimit, diçka që Ukraina kurrë nuk e ka dashur".
Zelensky tha se Rusia është "e vetmja palë që po e zgjat këtë luftë dhe po torturon si popullin tonë, ashtu edhe mbarë botën".
"Për ta detyruar Rusinë të bëjë paqe, duhen masa të forta dhe veprime vendimtare", tha ai në video-fjalimin e tij të përnatshëm.
"Jemi gati ta mbështesim çdo nismë të fuqishme që e bën diplomacinë më efektive", shtoi ai.
Ministri i Jashtëm i Ukrainës, Andriy Sybiha, shkroi në X se sulmi i 24 marsit në Sumi tregoi se fjalët e Moskës për paqe janë "boshe".
Armëpushim i pjesshëm, luftë e pandërprerë: Realitet i vrazhdë në Ukrainë dhe në Rusi
![<p>Banorët e një blloku banimi në rajonin Kirovohrad të Ukrainës duke pastruar rrënojat, më 20 mars, pas një sulmi rus me dronë.<br><br>Në fillim të marsit, Ukraina u pajtua për një armëpushim të plotë gjatë bisedimeve të vazhdueshme për paqe, por propozimi u hodh poshtë nga Rusia.<br><br>"Kush do të vlerësojë se ku dhe kush e ka shkelur një marrëveshje të mundshme armëpushimi përgjatë 2.000 kilometrash [vijë fronti]? Dhe, kush do ta fajësojë kë për shkeljen e asaj marrëveshjeje?", u tha gazetarëve presidenti rus, Vladimir Putin.](https://gdb.rferl.org/996fd674-d5ab-45a9-a3da-b7507e907a7c_w1024_q10_s.jpg)
Edhe pala ruse raportoi për një sulm. Një zyrtar rus në rajonin u pushtuar ukrainas, Luhansk, tha se bombardimet ukrainase kanë vrarë gjashtë njerëz atje, përfshirë një gazetar të gazetës ruse Izvestia.
Gazeta pro-Kremlinit e identifikoi gazetarin si Alexander Fedorchak, duke thënë se ai u vra "në rajonin e Harkivit." Kanali rus Zvezda, i sponsorizuar nga Ministria e Mbrojtjes, raportoi se kameramani dhe shoferi i tij u vranë derisa po xhironin një reportazh me Fedorchakun.
Bisedimet në Arabinë Saudite janë pjesë e përpjekjes së presidentit të Shteteve të Bashkuara, Donald Trump, për t'i dhënë fund luftës në Ukrainë.
Takimi SHBA-Rusi të hënën u zhvillua një ditë pas bisedimeve të ndara midis SHBA-së dhe Ukrainës – gjithashtu në Arabinë Saudite – të cilat Kievi i quajti "frytdhënëse".
Serhiy Leshchenko, këshilltar i presidencës ukrainase, tha se delegacioni ukrainas qëndroi në Riad dhe pret të takohet sërish me amerikanët. Zelensky deklaroi në fjalimin e tij të natës se përfaqësuesit nga Ukraina dhe SHBA do të takohen përsëri, por nuk dha një datë të saktë.
Një burim i paidentifikuar në delegacionin rus u citua nga TASS duke thënë se Kremlini dhe Shtëpia e Bardhë do ta publikojnë një deklaratë të përbashkët më 25 mars.
Reuters citoi një burim rus të ketë thënë se një draft i deklaratës së përbashkët u dërgua në Moskë dhe Uashington për miratim dhe se të dyja palët synojnë ta lëshojnë atë më 25 mars.
Trump u tha gazetarëve në Shtëpinë e Bardhë se kufijtë territorialë dhe mundësia e pronësisë amerikane mbi termocentralin bërthamor të Zaporizhjas në Ukrainën jugore ishin pjesë e bisedimeve.
Javën e kaluar, Trump përmendi idenë që SHBA-ja të merrte kontrollin e centralit, i cili u kap nga Rusia në fillim të luftës.
Zëdhënësi i Kremlinit, Dmitry Peskov, tha se bisedimet midis Moskës dhe Uashingtonit ishin të përqendruara në çështje teknike, përfshirë sigurinë e transportit tregtar në rajonin e Detit të Zi.