Ndërlidhjet

DnV: Fushata për balotazh me shkelje flagrante të masave kundër COVID-19


Një person duke votuar në Prishtinë në raundin e parë të zgjedhjeve lokale më 17 tetor 2021.
Një person duke votuar në Prishtinë në raundin e parë të zgjedhjeve lokale më 17 tetor 2021.

Koalicioni i organizatave joqeveritare Demokracia në Veprim (DnV) tha se fushata e balotazhit për zgjedhjet lokale të 14 nëntorit në Kosovë, është përshkruar me shkelje të masave kundër koronavirusit nga partitë politike.

Në një konferencë për media më 13 nëntor, Eugen Cakolli nga DnV tha se në fushatën pesëditore për balotazhin, partitë nuk kanë respektuar pjesëmarrjen e lejuar deri në 80 persona, siç kërkohet me masat në fuqi kundër COVID-19.

“Aktivitetet e kandidatëve nëpër komuna, qofshin këto aktivitete në hapësira të mbyllura apo të hapura, në masë të madhe janë zhvilluar në shkelje flagrante të të gjitha masave anti-COVID në fuqi. Organizimi i tubimeve me numër shumëfish më të madh të pjesëmarrësve seç është e lejuar, mosbartja e maskave dhe mungesa e distancës në këto aktivitete janë evidentuar në secilin tubim të organizuar nga ana e partive politike”, tha Cakolli.

Ai shtoi se mungesa e kontrolleve sistematike nga ana e Policisë së Kosovës dhe Agjencisë së Ushqimit dhe Veterinarisë, dhe gjobat, që sipas tij kanë qenë të pamjaftueshme dhe kur janë shqiptuar kanë qenë në vlera minimale, “kanë bërë që takime të tilla në shkelje të masave të zhvillohen lirshëm në të gjitha komunave, e të intensifikohen posaçërisht gjatë ditës së fundit të fushatës ku subjektet politike kanë organizuar tubime, ku numri i pjesëmarrësve varione nga qindra e deri në mijëra sosh, ndonëse sipas masave në fuqi nuk është dashur të kalohet numri prej 80 pjesëmarrësve”.

Cakolli tha po ashtu se fushata për balotazh është karakterizuar me ashpërsim të diskursit mes kandidatëve gjatë debateve televizive, por edhe komunikimeve të tjera përmes rrjeteve sociale.

DnV-ja po ashtu tha se partitë nuk e kanë ndaluar fushatën që prej përfundimit të raundit të parë të zgjedhjeve më 17 tetor dhe se fushata e balotazhit ka qenë më shumë klasike dhe jo e fokusuar në rrjetet sociale.

Cakolli tha po ashtu se në këtë fushatë është vërejtur dukuria e abuzimit të resurseve publike më shumë sesa në fushatën për raundin e parë.

“Ajo është manifestuar me pjesëmarrje të anëtarëve të kabinetit qeveritar në tubime publike apo ecje nëpër sheshe, gjë që ka ndodhur kryesisht gjatë orarit të punës. Njëkohësisht, përfshirja e ekzekutivit në garën lokale, përmes ofrimit të mbështetjes për kandidatët e subjektit politik në pushtet, konkretisht duke e ndërlidhur zbatimin e pikave të caktuara programore apo projekteve të ndryshme me ofrimin e ndihmës financiare nga ana e qeverisë, ka ndikuar në parimin e garës së barabartë zgjedhore”, tha Cakolli, duke shtuar se abuzim me resurse publike është vërejtur edhe nga kandidatët për zgjedhje, që aktualisht janë edhe kryetarë komunash.

Të dielën, më 14 nëntor, në Kosovë do të mbahet në 21 komuna. Në raundin e dytë të zgjedhjeve, të drejtë vote kanë 1,260,571.

XS
SM
MD
LG