Macron: Franca do ta njohë shtetin palestinez

25 korrik 2025

Franca do ta njohë zyrtarisht shtetin palestinez në shtator, ka thënë presidenti francez, Emmanuel Macron.

Kështu, Franca do të bëhet shteti i parë anëtar në grupin e shtatë vendeve më të industrializuara (G7) që merr këtë hap.

Përmes një postimi në X – dikur Twitter – Macron ka thënë se njoftimi zyrtar do të bëhet në takimin e përvitshëm të Asamblesë së Përgjithshme të Kombeve të Bashkuara në Nju Jork.

“Nevoja urgjente sot është që të përfundojë lufta në Gazë dhe të shpëtohet popullsia civile. Paqja është e mundshme. Neve na duhet armëpushim i menjëhershëm, lirimi i të gjitha pengjeve dhe ndihmë masive humanitare për njerëzit e Gazës”, ka shkruar ai.

Zyrtarët palestinezë e kanë përshëndetur vendimin e Macronit, derisa kryeministri izraelit, Benjamin Netanyahu ka thënë se vendimi “shpërblen terrorin”, pas sulmit të Hamasit në Izrael, më 7 tetor të vitit 2023.

Hamasi është organizatë e shpallur terroriste nga Shtetet e Bashkuara dhe fuqi tjera.

Sekretari amerikan i Shtetit, Marco Rubio, ka thënë se SHBA-ja “kundërshton ashpër” vendimin e Macronit dhe e sheh si të "pamatur".

Vuajtjet e palestinezëve nga lufta dhe uria e thelluar në Gazë

1/25 Palestinezë duke vajtuar për të afërmit e tyre, që u vranë nga një bombardim i Gazës nga ushtria izraelite, në spitalin Shifa, në Qytetin e Gazës, më 22 korrik 2025.

2/25 Iman Shabat, nënë e pesë fëmijëve, duke bartur një thes me miell, të siguruar nga një karvan ndihmash humanitare, që mbërriti në Qytetin e Gazës nga veriu i territorit, më 22 korrik.

3/25 Palestinezë në një kamion ndihmash që po kthehej në Qytetin e Gazës nga pjesa veriore e Rripit të Gazës, më 22 korrik.

4/25 Palestinezë duke bartur thasë me miell, që i morën nga organizatat humanitare, më 22 korrik.

5/25 Palestinezë të tjerë duke bartur thasë me miell, më 22 korrik.

6/25 Palestinezë të zhvendosur duke marrë ushqim nga një kuzhinë popullore në Qytetin e Gazës, më 22 korrik.

7/25 Palestinezë duke u varur në një kamion ndihmash, më 22 korrik.

8/25 Palestinezë të lënduar duke u transferuar në një autoambulancë, pasi u plagosën teksa po prisnin të merrnin ndihma, më 22 korrik.

9/25 Një familje palestineze duke bartur me biçikletë një thes me miell, më 22 korrik.

10/25 Një palestinez me një thes me miell mbi supe, më 22 korrik.

11/25 Një burrë palestinez duke mbajtur kufomën e një fëmije të vrarë nga një sulm ajror izraelit në Gazë, më 22 korrik.

12/25 Kufoma të palestinezëve të vrarë nga sulmet izraelite, në një morg në spitalin Shifa, më 22 korrik.

13/25 Flakë dhe tym pas një sulmi ajror izraelit në Qytetin e Gazës, më 21 korrik.

14/25 Një burrë palestinez duke bartur mbi kokë një thes me ndihma, më 22 korrik.

15/25 Një vajzë palestineze duke pritur për të marrë ndihma nga një kuzhinë popullore, më 22 korrik.

16/25 Palestinezë të uritur duke zgjatur enët për të marrë ushqim nga një kuzhinë popullore, më 14 korrik.

17/25 Zainab Abu Haleeb, vajzë pesëmuajshe palestineze, e diagnostikuar me kequshqyerje, sipas mjekëve, duke qëndruar në një shtrat teksa po trajtohej në spitalin Nasser, në Han Junis, në jug të Rripit të Gazës, më 15 korrik.

18/25 Një burrë palestinez duke mbajtur kufomën e nipit të tij gjashtëjavësh, Yousef al-Safadi, i cili vdiq nga uria, sipas zyrtarëve shëndetësorë, në Qytetin e Gazës, më 22 korrik.

19/25 Mosab Al-Debs, djalë palestinez, 14-vjeçar, që vuan nga kequshqyerja, sipas mjekëve, duke u trajtuar në spitalin Shifa, më 22 korrik.

20/25 Një fëmijë mes palestinezëve që po prisnin për të marrë ushqim, më 22 korrik.

21/25 Të afërm duke vajtur pranë trupit të pajetë të një familjari të tyre, që u vra nga të shtënat izraelite teksa po priste të merrte ndihma, në Qytetin e Gazës, më 20 korrik.

22/25 Fëmijë palestinezë duke pritur ndihma në Qytetin e Gazës, më 14 korrik.

23/25 Palestinezë të shumtë duke bartur ndihmat që i morën në Beit Lahia, në veri të Rripit të Gazës, më 20 korrik.

24/25 Palestinezë duke marrë ushqim nga një kuzhinë popullore, në Qytetin e Gazës, më 22 korrik.

25/25 Nëna palestineze, Alaa Al-Najjar, duke qarë teksa në duar mbante foshnjen e saj tremuajshe, Yehia, që vdiq për shkak të kequshqyerjes, sipas mjekëve, më 10 korrik.

Grupi G7 përbëhet edhe nga Shtetet e Bashkuara, Mbretëria e Bashkuar, Italia, Gjermania, Kanadaja dhe Japonia.

Në postimin e tij në X, Macron ka thënë se Franca do ta njohë shtetin palestinez në linjë me përkushtimin historik për paqe afatgjatë në Lindje të Mesme.

“Ne duhet të garantojnë çarmatosjen e Hamasit dhe rindërtimin e Gazës”.

Macroni e ka bërë publike letrën që ia ka nisur presidentit të Autoritetit Palestinez, Mahmoud Abbas duke e konfirmuar vendimin.

Duke iu përgjigjur njoftimit të Macronit, zëvendësi i Abbasit, Hussein al-Sheikh, ka thënë se “ky pozicion reflekton përkushtimin e Francës për ligj ndërkombëtar dhe mbështetjen e saj për të drejtën e popullit palestinez për vetëvendosje dhe themelim të shtetit tonë të pavarur”, ka raportuar agjencia e lajmeve AFP.

Aktualisht shtetin palestinez e njohin më shumë se 140 prej 193 vendeve anëtare të Kombeve të Bashkuara.

Disa vende të Bashkimit Evropian – përfshirë Spanjën dhe Irlandën – janë në mesin e tyre.

SHBA-ja, aleatja kryesore e Izraelit, nuk e njeh shtetin palestinez.

SHIKONI EDHE:

Merz nën presion për të ashpërsuar qëndrimin ndaj Izraelit

Izraeli e ka nisur fushatën ushtarake në Gazë në përgjigje të sulmit të kryer nga Hamasi në jug të Izraelit më 7 tetor 2023, si pasojë e të cilit janë vrarë 1.200 njerëz dhe janë marrë peng rreth 240 të tjerë.

Sipas autoriteteve shëndetësore palestineze, mbi 59.000 palestinezë janë vrarë në Gazë prej atëherë.

Pjesa më e madhe e Gazës tani është shndërruar në gërmadhë.

Agjencia e OKB-së për Refugjatë Palestinezë (UNRWA) ka thënë se një në pesë fëmijë në qytetin e Gazës tani është i kequshqyer dhe që numri i rasteve po rritet çdo ditë.

Mbi 100 organizata ndërkombëtare të ndihmës dhe grupe për të drejta të njeriut kanë paralajmëruar për uri masive në Rripin e Gazës, duke iu bërë presion qeverive në botë që të veprojnë.

Izraeli, i cili kontrollon hyrjen e të gjitha furnizimeve në Gazë, përsërit se nuk ka rrethim dhe e fajëson Hamasin për çdo rast të kequshqyerjes.

Ndërlidhjet

Na ndiqni

Macron: Franca do ta njohë shtetin palestinez

Vuajtjet e palestinezëve nga lufta dhe uria e thelluar në Gazë

Merz nën presion për të ashpërsuar qëndrimin ndaj Izraelit

Ky material është pjesë e rubrikave