Ndërlidhjet

Policia izraelite hyn në kompleksin e xhamisë Al-Aksa


Forcat e sigurisë së izraelit gjatë përleshjeve me protestuesit palestinezë para kompleksit të xhamisë Al-Aksa më 15 prill 2022.

Policia izraelite ka hyrë në kompleksin e xhamisë Al-Aksa, një vend i shenjtë në Jerusalem, dy ditë pas përleshjeve midis forcave të sigurisë dhe palestinezëve, përleshje që kanë lënë dhjetëra të plagosur.

Policia ka larguar palestinezët nga zona jashtë xhamisë mëngjesin e 17 prillit, ndërsa dhjetëra palestinezë mbetën brenda ndërtesës.

Policia izraelite tha se palestinezët kishin grumbulluar gurë dhe kishin ngritur barrikada, duke u përgatitur për dhunë.

Menjëherë pas kësaj, palestinezët raportuan për përleshje me policinë izraelite jashtë kompleksit të xhamisë. Mjekët palestinezë thanë se dhjetë persona janë plagosur.

Policia izraelite tha se ka hyrë në kompleks për të lehtësuar një vizitë rutinë të hebrenjve në këtë vend të shenjtë, duke shtuar se forcat e sigurisë po vazhdojnë të mundësojnë lirinë e adhurimit për hebrenjtë dhe myslimanët.

Ky vend është jashtëzakonisht i rëndësishëm për myslimanët dhe hebrenjtë i njohur si Mali i Tempullit. Po ashtu, prej kohësh është një zonë ku ka dhunë mes izraelitëve dhe palestinezëve.

Më 15 prill, përleshjet nisën në këtë vend pasi policia tha se palestinezët hodhën gurë drejt Murit Perëndimor, një vend i shenjtë hebre që gjendet pranë.

Policia tha se zyrtarët hynë në këtë zonë pasi u sulmuan me fishekzjarrë, gurë dhe objekte të tjera. Tre policë palestinezë u lënduan, thanë ata. Sipas raportimeve, mbi 150 palestinezë raportohet se janë plagosur.

Tensionet janë rritur pas një serie sulmesh nga palestinezët që vranë 14 persona në Izrael. Trupat izraelite kanë kryer një valë arrestimesh dhe operacionesh ushtarake në gjithë Bregun e pushtuar Perëndimor, duke shkaktuar përleshje me palestinezët. Të paktën 25 palestinezë janë vrarë, ka raportuar Associated Press.

XS
SM
MD
LG