Ndërlidhjet

Të paktën 60 persona vdesin nga sulmi në një dasmë në Kabul


Pamje pas sulmit në një dasmë në Kabul
Ju lutem të prisni

No media source currently available

0:00 0:01:41 0:00

Pamje pas sulmit në Kabul.

Një bombë ka shpërthyer në një sallë dasmash në kryeqytetin e Afganistanit, Kabul, duke lënë të vdekur 63 persona dhe duke plagosur më shumë se 180 të tjerë.

Dëshmitarët i kanë thënë BBC-së, se sulmuesi vetëvrasës ka kryer sulmin gjatë një ceremonie të dasmës.

Shpërthimi ka ndodhur në perëndim të kryeqytetit, kryesisht të populluar me myslimanë shiitë.

Grupi militant, Shteti Islamik mori përgjegjësinë për sulmin, duke thënë përmes një deklarate se sulmuesi vetëvrasës ka arritur të infiltrohet në dasmë dhe ka shpërthyer eksplozivët e tij "në mesin e turmës me të pafe".

Militantët myslimanë sunitë, duke përfshirë, talibanët dhe grupin militant, Shteti Islamik në të kaluarën kanë kryer sulme në zonat e banuara me myslimanë shiitë në Afganistan dhe Pakistan.

Ministria e Brendshme afgane ka konfirmuar se ka dhjetëra të vdekur si pasojë e sulmit.

Në disa pamje në rrjetet sociale janë parë trupa të vdekur në sallë, dhe tavolinat e karriget të kthyera mbrapsht.

Në dasmat afgane zakonisht janë të ftuar qindra persona, dhe zakonisht burrat janë të ndarë nga gratë dhe fëmijët.

Mysafiri, Mohammad Farhag, ka thënë se ka qenë në zonën e grave kur ka dëgjuar një shpërthim masiv në anën e burrave.

“Të gjithë kanë dalë jashtë duke bërtitur dhe duke qarë”, ka thënë ai për agjencinë e lajmeve AFP.

“Për gati 20 minuta salla ka qenë e mbushur me tym. Pothuajse të gjithë burrat që kanë qenë aty janë të vrarë apo të plagosur.

Dhëndri i dasmës, Mirwais ka thënë për një televizion lokal: Familja ime, nusja ime janë të shokuar, nuk mund të flasin. Kam humbur vëllanë, shokët, familjarët. Nuk do të jem i lumtur kurrë më.

Presidenti afgan, Ashraf Ghani e ka përshkruar sulmin si “barbar” në një postim në rrjetin social, Twitter.

Zëdhënësi i talibanëve, Zabiullah Mujaheed, e ka “dënuar ashpër sulmin”.

“Nuk ka arsyetim për vrasje të tilla dhe shënjestrim të grave dhe fëmijëve”, ka thënë Mujaheed.

Ky sulm ka ndodhur 10 ditë pasi një sulm i madh me bombë jashtë stacionit policor në Kabul ka lënë të vdekur 14 persona dhe ka plagosur gati 150 të tjerë.

Talibanët patën marrë përgjegjësinë për këtë sulm.

Tensionet në këtë shtet kanë qenë të larta, pavarësisht pse talibanët dhe Shtetet e Bashkuara, të cilat kanë mijëra trupa ushtarake në Afganistan, është raportuar se janë afër arritjes së një marrëveshjeje për paqe.

Talibanët dhe përfaqësuesit amerikanë kanë mbajtur një varg bisedimesh në kryeqytetin e Katarit, Doha, dhe të dyja palët kanë thënë se është arritur përparim.

Të premten presidenti amerikan, Donald Trump ka thënë përmes një postimi të Twitter se të dyja palët “synojnë të arrijnë një marrëveshje, nëse është e mundur”.

Në marrëveshje përfshihet një tërheqje e përkohshme e forcave të SHBA-së në këmbim të zotimit të talibanëve se Afganistani nuk do shfrytëzohet nga grupet ekstremiste për të sulmuar shënjestrat amerikane.

Sipas marrëveshjes, talibanët duhet të nisin negociatat edhe me delegacionin afgan, duke mos hedhur poshtë as armëpushimin.

Militantët talibanë kanë refuzuar që të negociojnë me qeverinë afgane, meqë ata e konsiderojnë këtë të fundit kukull të perëndimit.

Ata tani kontrollojnë më shumë territor se asnjëherë më parë, prej kur janë larguar nga pushteti më 2001.

Përgatiti: Krenare Cubolli
XS
SM
MD
LG