Pas tetë orësh bllokimi të një pjese të qendrës së Tivarit dhe kërcënimit se do të shpërthente eksplozivë para një banke, Edin Begziq u dorëzua në polici pas bisedimeve me autoritetet e rendit dhe zëvendëskryeministrin, Dritan Abazoviq. Policia e ka marrë Begziqin me pranga dhe e ka futur në një furgon policie, raportojnë gazetarët e Radios Evropa e Lirë nga vendi i ngjarjes.
Begziq kërcënoi se do të aktivizojë eksplozivë duke kërkuar që ish-punëtorëve të kompanisë në falimentim “Primorka”, t’u paguhen pagat e mbetura. Policia evakuoi edhe ndërtesën në të cilën ndodhet filiali i bankës dhe përtej shiritit të sigurisë së policisë mund të kalojnë vetëm policët dhe zjarrfikësit.
Zëdhënësi i Prokurorisë Themelore të Shtetit në Tivar, Radovan Gjurishiq, tha për Radion Evropa e Lirë se në bankë nuk kishte pengje dhe se Begziq kishte ardhur në bankë herët në mëngjes dhe nuk i ka lejuar punëtorët të hyjnë.
Begziq kishte vendosur disa kanistër para objektit të bankës në të cilat besohet se ishin materie shpërthyese.
Më herët gjatë ditës është deklaruar edhe NLB banka në filialin e së cilës në Tivar po zhvillohet ngjarja. Banka njoftoi se ky filial në mëngjes nuk është hapur.
Në orët e hershme të mëngjesit të së martës, Begziq kishte ngjitur një pllakat mbi degën e Bankës në të cilin shkruante “Ktheni paratë që i vodhët nga punëtorët e 'Primorka-s'” dhe ka njoftuar se i armatosur do të mbajë punëtorët e bankës nën kontroll derisa paratë t’u kthehen punëtorëve.
Në një video, të cilën Begziq e ka publikuar në YouTube para aksionit të tij, ai ka thënë ka të veshur jelek antiplumb, maskë kundër gazit lotsjellës dhe koktej molotovi dhe ka revole me plumba dhe dy eksplozivë të improvizuar me komandë.
“Nëse kjo video nuk publikohet, kjo nënkupton që unë ia dola të hyj në filialin e bankës së hajdutëve NLB Banka në Tivar. E them të hajdutëve sepse kjo bankë, me ndihmën e shtetit dhe institucioneve të saj, vodhi paratë e popullit të ndershëm dhe të mjerë dhe punëtorëve të kompanisë ‘Primorka’ nga Tivari në vitin 2010”, ka thënë Begziq në fillim të videos, në të cilën prezantohet si i biri i njërit prej ish-punëtorëve të kompanisë.
Në videon e publikuar, Begziq i drejtohet kryeministrit të Malit të Zi, Zdravko Krivokapiq, zëvendëskryeministrit, Dritan Abazoviq dhe kryetarit të Parlamentit, Alleksa Beçiq me thirrjen që të flasin me drejtorin e NLB Bankës dhe të kërkojnë pagesën e parave të ish-punëtorëve bashkë me kamatën që iu takon.
Begziq kishte porositur zëvendëskryeministrin Abazoviq, që do të jetë përgjegjës nëse “kushdo dërgon sigurim privat, polici apo ushtri për të provokuar ndonjë konflikt”.
“Në mesin e punëtorëve janë babai dhe nëna ime. Unë jam i gatshëm të luftoj për ta e edhe më i gatshëm të jap jetën për ata”, tha Begziq.
Kompania “Primorka” ka qenë një prej bartësve të zhvillimit të Komunës së Tivarit.
Gjatë periudhës transicionale punëtorët kanë mbetur pa punë me paga të papaguara dhe programin e papaguar social.
Qeveria e Malit të Zi më 1 qershor 2010 ka dhënë garanci prej 4 milionë eurosh për kredi prej 14.4 milionë euro për kompaninë “Melgonija Primorka”.
Për kredi ishte ofruar e gjithë prona e kompanisë.
Nga kjo kredi punëtorët nuk janë paguar kurrë ndonëse kredia i dedikohej pagesës së pagave të mbetura, lidhjes së vjetëve të punës, krijimit të programit social dhe obligimit ndaj furnizuesve.
Prokuroria Speciale e Malit të Zi pati nisur hetime për keqpërdorime në kompani dhe ka arrestuar 12 persona të dyshuar të cilët me kushte të volitshme kishin blerë pronën e kompanisë derisa ajo ishte në falimentim, madje me kredinë të cilën e financoi banka e caktuar.
Të arrestuarit madje dyshohen se në mënyrë të pavërtetë kanë treguar gjendjen dhe rezultatet e punës së kompanisë, sikurse edhe planin që kredia do të përdoret për ruajtjen e prodhimit në kompani.
