Ndërlidhjet

Pas zgjedhjeve në veri, KFOR-i bën thirrje për përmbajtje nga retorika eskaluese


Pjesëtarë të KFOR-it në Mitrovicën e Veriut ditën kur u mbajtën zgjedhjet për kryetar të komunës, më 23 prill.
Pjesëtarë të KFOR-it në Mitrovicën e Veriut ditën kur u mbajtën zgjedhjet për kryetar të komunës, më 23 prill.

Misioni paqeruajtës i NATO-s në Kosovë, KFOR, kanë bërë thirrje për shmangie të “veprimeve dhe retorikës eskaluese”, mes Kosovës dhe Serbisë.

Ky mision vlerësoi se zgjedhjet në katër komunat me shumicë serbe kaluan pa incidente.

“Gjatë gjithë kohës, KFOR-i ka qëndruar në kontakt të ngushtë me të gjitha palët e interesit dhe ka monitoruar situatën në terren”, thuhet në një deklaratë në lidhje me zgjedhjet e 23 prillit në katër komunat veriore.

Këto zgjedhje u bojkotuan gjerësisht nga popullata serbe dhe dalja në to, sipas Komisionit Qendror të Zgjedhjeve (KQZ), ishte vetëm 3.47 për qind.

“Normalizimi i marrëdhënieve ndërmjet Beogradit dhe Prishtinës është thelbësor për sigurinë e qëndrueshme në të gjithë Kosovën dhe stabilitetin në rajonin e Ballkanit Perëndimor”, thuhet tutje në deklaratën e KFOR-it.

Sipas rezultateve preliminare, garën për kryetar komune në Mitrovicë të Veriut dhe Leposaviq, e fituan kandidatët e Lëvizjes Vetëvendosje, ndërkaq në Zveçan dhe Zubin Potok fituan ata të Partisë Demokratike të Kosovës.

Nga dhjetë kandidatë, vetëm një ishte nga komuniteti serb.

Më parë këto komuna janë udhëhequr nga anëtarë të partisë më të madhe serbe në Kosovë, Lista Serbe, e cila kësaj here i bojkotoi zgjedhjet.

Për bojkotimin e zgjedhjeve nga serbët e Kosovës, liderët kosovarë e fajësuan ndikimin e Beogradit.

Ndërkaq, liderët e Serbisë kanë paralajmëruar “një krizë të thellë” në atë zonë.

Komunat në veri mbetën pa kryetarë nga nëntori i vitit të kaluar, kur përfaqësuesit serbë në atë zonë dhanë dorëheqje nga vendet e tyre të punës, për shkak të mospajtimit me një vendim të Qeverisë së Kosovës për riregjistrimin e makinave me targa ilegale serbe.

XS
SM
MD
LG