Shqipëria konfirmon dërgimin e trupave në Kosovë
Ministria e Mbrojtjes së Shqipërisë tha të premten se ka nisur për në Kosovë një grup prej 30 efektivësh komando nga Forcat e Armatosura.
Ky kontingjent do t’i bashkohet forcave të Misionit të NATO-s në Kosovë, KFOR.
Ministri i Mbrojtjes, Niko Peleshi, tha se ky mision në Kosovë do të kontribuojë për paqen në rajonin e Ballkanit Perëndimor, teksa janë rritur tensionet pas nisjes së pushtimit të Ukrainës nga Rusia.
“Në këto ditë të sfiduara të paqes dhe sigurisë globale kjo e shton dyfish e rrit vëmendjen, por edhe përgjegjshmërinë e secilit prej nesh e secilit prej jush për të shërbyer me profesionalizëm, me disiplinë ushtarake, me dinjitet në respektim të kodit të etikës dhe të vlerave të aleancës tonë”, tha ai sipas një komunikate të Ministrisë së Mbrojtjes.
Ndërkaq, shefi i Shtabit të Përgjithshëm të Forcave të Armatosura, gjeneralmajor, Bajram Begaj, tha se dërgimi i forcave në Kosovë po bëhet në një moment të “turbullt” të sigurisë në krahun lindor të aleancës.
“Siguria globale është më shumë se kurrë ndonjëherë e rrezikuar dhe e kërcënuar. Rajoni dhe vendi ynë nuk janë imunë ndaj këtyre veprimeve të Rusisë”, tha ai.
Efektivët shqiptarë do të shërbejnë përkrah trupave të Kroacisë dhe Italisë.
Dërgimi i trupave shqiptare në Kosovë vjen një ditë pasi NATO tha se është e përkushtuar që të garantojë siguri në Kosovë dhe në mbarë Ballkanin Perëndimor.
Serbia sërish mbledh Këshillin e Sigurisë Kombëtare për të biseduar për Ukrainën
Në Beograd është mbajtur seanca e Këshillit të Sigurisë Kombëtare, e kryesuar nga presidenti serb, Aleksandar Vuçiq.
Seanca, siç është publikuar në llogarinë në Instagram të presidentit të Serbisë, ka nisur rreth orës 16:00.
Beogradi zyrtar ende nuk ka bërë të ditur qëndrimin pas nisjes së pushtimit rus të Ukrainës.
Serbia duhet t'i përgjigjet kërkesës së Bashkimit Evropian (BE) nëse do t’i bashkohet sanksioneve kundër Moskës.
Deri më tani, Serbia nuk e ka dënuar pushtimin rus të Ukrainës. Përveç vendeve të Bashkimit Evropian, të njëjtën gjë e bënë edhe shumica e liderëve të Ballkanit Perëndimor.
Vuçiq pritet të ketë një adresim për këtë temë pas orës 18:00.
Erdogan: Reagimi i NATO-s dhe Perëndimit ndaj sulmit rus nuk është i vendosur
Presidenti turk, Recep Tayyip Erdogan, tha të premten se reagimi i NATO-s dhe vendeve perëndimore lidhur me sulmin e Rusisë ndaj Ukrainës nuk ishte i vendosur, duke shtuar se ai shpresonte se samiti i NATO-s të premten do të çonte në një pozicion më të vendosur të Aleancës.
Turqia, anëtare e NATO-s, kufizohet me Ukrainën dhe Rusinë në Detin e Zi dhe ka lidhje të mira me të dyja vendet. Ajo i bëri thirrje Rusisë që të ndalojë sulmin dhe shprehu mbështetjen për integritetin territorial të Ukrainës.
“Kjo nuk do të duhej të kthehej në një vërshim të dënimeve të zakonshme. NATO duhet të kishte ndërmarrë një hap më të vendosur”, tha Erdogan pas lutjes të së premtes në Stamboll.
“BE-ja dhe të gjitha mentalitetet perëndimore nuk kanë treguar një qëndrim të caktuar serioz. Të gjithë ata vazhdimisht po e këshillojnë Ukrainën”, u tha ai gazetarëve. “Me këshillë nuk mund të arrihet diku. Kur shikoni hapat e ndërmarra, ata nuk janë fare”.
Pavarësisht valës së sanksioneve perëndimore kundër Rusisë, Turqia ka thënë se kundërshton lëvizje të tilla. Erdogan gjithashtu shmangu përdorimin e fjalëve të tilla si “dënoj” në reagimin e tij ose “pushtim” për të përshkruar atë që po ndodhte.
Ukrainasit bëhen gati për sulmin rus në Kiev
Kievi po përgatitet për një sulm rus më 25 shkurt, teksa forcat pushtuese kanë arritur në periferi të kryeqytetit ukrainas. Ministria ukrainase e Mbrojtjes u tha banorëve që të bëjnë koktej molotovi me benzinë dhe të ndihmojnë ushtrinë që të “normalizojë” sulmuesit rusë.
Të shtëna janë raportuar pranë qarkut ku gjendet Qeveria në Kiev, teksa trupat ruse po godasin kryeqytetin ukrainas. Sirenat janë lëshuar në Kiev, qytet me tre milionë banorë, shumica prej të cilëve po strehohen në stacionet e metrosë.
Banorët strehohen në metronë e Kievit
Presidenti ukrainas, Volodymyr Zelenskiy tha se trupat ruse po shënjestrojnë zona të banuara me civilë, teksa ata po avancojnë me trupa dhe tanke nga tri drejtime.
Po ashtu ka raportime për luftime të vazhdueshme midis forcave ukrainase dhe ruse në qarkun verior Obolon të kryeqytetit.
Forcat ukrainase, ndërkaq, janë dislokuar në Kiev me pajisje të rënda ushtarake për ta mbrojtur kryeqytetin.
“Qyteti është në gjendje mbrojtjeje”, tha kryetari i Kievit, Vitali Klitchko, sipas agjencisë së lajmeve UNIAN. Ai tha se të shtënat me armë dhe shpërthime në disa zona të qytetit, nënkuptojnë se “sabotuesit” rusë po eliminohen.