Ndërlidhjet

Kosova dhe Shqipëria riatdhesojnë 15 shtetas nga Siria


Të kthyerit nga Siria të vendosur në kampin Vranidoll. Fotografi nga arkivi.
Të kthyerit nga Siria të vendosur në kampin Vranidoll. Fotografi nga arkivi.

Kosova ka riatdhesuar dy shtetas të saj nga kampet në Siri, përmes një operacioni të përbashkët me Shqipërinë.

Ky operacion është mbështetur nga Shtetet e Bashkuara dhe Shqipëria tha se ka riatdhesuar 13 shtetas të saj.

"Kjo është vazhdimësi e angazhimit të Qeverisë së Kosovës për rikthimin dhe riintegrimin e qytetarëve tanë që ka filluar nga viti 2019", tha ministri i Punëve të Brendshme të Kosovës, Xhelal Sveçla përmes një postimi në Facebook.

Ndërkaq, gjatë një adresimi nga aeroporti i Prishtinës "Adem Jashari", Sveçla bëri të ditur se ky nuk do të jetë aksioni i fundit i përbashkët me autoritetet shqiptare.

“Ekipet tona të profileve të ndryshme kanë shumë punë, që këta individë të rehabilitohen e ata që janë të radikalizuar të deradikalizohen në mënyrë që të bëhen pjesë e shoqërisë sonë, e posaçërisht fëmijët të cilët me asnjë rast nuk janë fajtorë për situatën në të cilën ndodhen”, tha Sveçla.

Autoritetet në Shqipëri bën të ditur se në këtë operacion janë riatdhesuar katër gra dhe nëntë fëmijë, duke bërë që numri i përgjithshëm i të riatdhesuarve të arrijë në 43.

Në prill të vitit 2019, Kosova kishte kthyer 110 shtetas nga Siria, në mesin e të cilëve katër luftëtarë të Shtetit Islamik, 32 gra dhe 74 fëmijë, ndërkaq në korrik të vitit 2021, autoritetet riatdhesuan edhe 11 shtetas nga Siria.

Nga viti 2011, më shumë se 350 shtetas të Kosovës udhëtuan drejt Sirisë dhe Irakut. Shumica prej tyre është thënë se u rreshtuan përkrah grupit militant Shteti Islamik. Ndërkaq, 70 shtetas nga Shqipëria besohet se i janë bashkuar IS-it, edhe pse konfirmim zyrtar të numrit të tyre nuk ka.

XS
SM
MD
LG