Ndërlidhjet

Rusët godasin infrastrukturën e Ukrainës ndërsa lufta hyn në ditën e saj të 300-të


Presidenti ukrainas, Volodymyr Zelensky, përkujton ushtarët e rënë në luftë me një minut heshtje, gjatë vizitës së tij në qytetin e Bahmutit. 20 dhjetor 2022.
Presidenti ukrainas, Volodymyr Zelensky, përkujton ushtarët e rënë në luftë me një minut heshtje, gjatë vizitës së tij në qytetin e Bahmutit. 20 dhjetor 2022.

Luftimet e ashpra po vazhdojnë në Donjeck, teksa forcat ruse vazhduan sulmet e tyre në Ukrainën lindore. Presidenti ukrainas, Volodymyr Zelensky, vizitoi Bahmutin, një nga dy qytetet e vijës së parë të frontit, ku bashkë me Avdijivkan kanë qenë në qendër të ofensivës disamujore të Moskës.

Pushtimi i paprovokuar rus i Ukrainës ka hyrë në ditën e 300-të.

Luftimet më të ashpra janë aktualisht në Donjeck, në linjën Bahmut-Avdijivka.

Ushtria ukrainase tha se forcat e saj ajrore kryen 22 sulme në pozicionet ruse, ndërsa sistemet e saj të mbrojtjes ajrore rrëzuan dy helikopterë të armikut.

Pretendimet nuk mund të verifikoheshin në mënyrë të pavarur.

Zelensky ka bërë një vizitë të paparalajmëruar në qytetin e vijës së parë të frontit, Bahmut, ku takoi ushtarët dhe u ndau çmime për ta.

Në rajonin qendror Dnipropetrovsk, granatimet ruse gjatë natës shkaktuan shkatërrim në zonën e Nikopolit, shkroi kreu i administratës rajonale, Valentyn Reznychenko, në Telegram.

"Dy fshatra, Myryivska dhe Pokrovska, u shënjestruan tri herë me zjarr të rëndë artilerie. Të paktën 20 predha u qëlluan në fshatra paqësore. Njerëzit mbijetuan", tha ai.

Ai bëri të ditur se janë dëmtuar shumë shtëpi private dhe ndërtesa komerciale, tubacione gazi dhe linja të energjisë.

Në qytetin jugor të Hersonit, dy persona u vranë dhe tre u plagosën si rezultat i bombardimeve ruse, tha më 20 dhjetor kreu i administratës ushtarake rajonale, Yaroslav Yanushevych.

"Okupatorët rusë bombarduan territorin e Hersonit 42 herë. Ata u qëlluan me artileri, armë kundërajrore, mortaja, tanke . Gjithashtu pati edhe një sulm me raketa”, tha ai.

Hersoni u kthye nën kontrollin ukrainas më 11 nëntor, por forcat ruse që ishin larguar nga qyteti, kanë vazhduar ta godasin atë nga përtej lumit Dnjepër.

Granatimet e fundit ndodhën një ditë pasi autoritetet ukrainase thanë se Rusia synoi infrastrukturën energjetike dhe objektiva të tjera civile me një tufë tjetër dronësh kamikazë në Kiev dhe zonën përreth.

Oleskiy Kuleba, guvernator i rajonit të Kievit, tha se infrastruktura dhe shtëpitë private u dëmtuan nga sulmet dhe se dy persona u plagosën.

"Vendi terrorist vazhdon luftën e tij kundër popullsisë civile", shkroi ai në një postim për Telegram. “Ne do të kapërcejmë gjithçka”.

Operatori i rrjetit të energjisë, Ukrenerho, tha se situata me rrjetin në mbarë vendin ishte "e vështirë" dhe se zona Dnipropetrovsk dhe rajonet lindore dhe qendrore ishin më të prekurat.

Rusia ka përdorur raketa lundrimi dhe dronë të prodhuar nga Irani për të goditur infrastrukturën energjetike të Ukrainës në mbarë vendin, si pjesë e një strategjie të dukshme për të demoralizuar popullsinë.

Zyrtarët ukrainas kanë bërë thirrje për donacione nga Perëndimi, si gjeneratorë dhe pajisje të rrjetit elektrik, por edhe sisteme më të avancuara të mbrojtjes ajrore.

Zelensky e përsëriti këtë thirrje drejtuar udhëheqësve perëndimorë që u takuan në Letoni.

“Unë kërkoj nga ju që të rrisni mundësinë e furnizimit të sistemeve të mbrojtjes ajrore në vendin tonë dhe të ndihmoni në përshpejtimin e vendimeve përkatëse që do të merren nga partnerët tanë”, tha ai.

Presidenti rus, Vladimir Putin, u takua në Minsk me homologun e tij bjellorus, Alyaksandr Lukashenka, më 19 dhjetor mes spekulimeve se Moska mund të përpiqet të shtyjë forcat bjelloruse të sulmojnë Ukrainën nga veriu.

Të dyja vendet do të vazhdojnë të mbajnë stërvitje të përbashkëta ushtarake dhe do të ruajnë bashkëpunimin ushtarak në fusha të tjera, thanë më pas Putin dhe Lukashenka.

Pushtimi rus i Ukrainës ka nisur më 24 shkurt.

Përgatiti: Erjonë Popova
XS
SM
MD
LG