Ndërlidhjet

Shefi i diplomacisë së Bashkimit Evropian, Josep Borrell.
Shefi i diplomacisë së Bashkimit Evropian, Josep Borrell.

Borrell: Kemi marrëveshje mes Kosovës e Serbisë

  • Kryeministri i Kosovës, Albin Kurti, dhe presidenti i Serbisë, Aleksandar Vuçiq, u takuan më 18 mars në Ohër të Maqedonisë së Veriut, në kuadër të procesit të dialogut për normalizimin e marrëdhënieve dhe pas më se 10 orësh bisedime, arritën marrëveshje për zbatimin e propozimit evropian.
  • Ndërmjetësues të takimit ishin diplomatët evropianë, Josep Borrell dhe Mirosllav Lajçak. Në cilësinë e vëzhguesit ishte i dërguari i SHBA-së për Ballkanin Perëndimor, Gabriel Escobar.
  • Në Ohër, palët u pajtuan për aneksin e zbatimit të një propozimi të BE-së për normalizimin e marrëdhënieve Kosovë-Serbi.
  • Kurti dhe Vuçiq e kanë pranuar në parim propozimin e BE-së gjatë një takimi në Bruksel, më 27 shkurt.
  • Propozimi i BE-së nuk e obligon Serbinë që ta njohë Kosovën, por kërkon nga të dyja vendet që t’i njohin dokumentet e njëra-tjetrës, si: pasaportat, diplomat dhe targat e makinave.
  • SHBA-ja e ka mbështetur propozimin e BE-së, i cili më herët është njohur edhe si plani franko-gjerman.
23:23 18.3.2023

Borrell: Kemi marrëveshje

Shefi i diplomacisë së Bashkimit Evropian, Josep Borrell, tha se pas 12 orësh bisedime, Kosova dhe Serbia kanë arritur marrëveshje për propozimin evropian.

“Kosova dhe Serbia janë pajtuar për zbatimin e aneksit të marrëveshjes për rrugën drejt normalizimit të raporteve mes tyre”, tha ai, duke iu referuar propozimit evropian që palët e pranuan më 27 shkurt në Bruksel.
Shefi i diplomacisë së Bashkimit Evropian, Josep Borrell. Ohër, 18 mars 2023.
Shefi i diplomacisë së Bashkimit Evropian, Josep Borrell. Ohër, 18 mars 2023.
Borrell, pas takimit në Ohër me kryeministrin e Kosovës, Albin Kurti, dhe presidentin e Serbisë, Aleksandar Vuçiq, tha e palët u pajtuan që të respektojnë të gjitha nenet e marrëveshjes së 27 shkurtit.

"Për zbatimin e nenit 7, Kosova është pajtuar të nisë menjëherë negociatat në dialogun e lehtësuar nga BE-ja për të krijuar rregullime specifike dhe garanci në mënyrë që të sigurojë një nivel të përshtatshëm të vetëmenaxhimit për komunitetin serb në Kosovë", tha ai.

Ky nen është parë si referencë për Asociacionin e komunave me shumicë serbe në Kosovë, që kryeministri i Kosovës, Albin Kurti, deri më tani ka refuzuar që ta themelojë.

Zyrtari i lartë evropian po ashtu tha se në takim, Kurti dhe Vuçiq kanë mbështetur "deklaratën për personat e zhdukur, ashtu siç është negociuar në dialogun e ndërmjetësuar nga BE-ja, si çështje urgjente".

Borrell tha se fillimisht blloku evropian kishte paraparë një aneks më të detajuar, por palët nuk arritën që të pajtoheshin për një version të tillë.

“Kjo ishte, në njërën anë për shkak të, mendoj se njëra palë, Kosova kishte mungesë të fleksibilitetit për këtë çështje, dhe në anën tjetër sepse Serbia paraprakisht deklaroi se nuk do të nënshkruante edhe pse ne jemi plotësisht të gatshëm ta zbatojmë”, tha Borrell.

"Pavarësisht faktit se paraprakisht ishte propozuar një tekst më ambicioz ajo çfarë palët kanë pranuar, që nënkupton marrëveshjen dhe zbatimin përmes aneksit, do të bëhet pjesë integrale e rrugëve të tyre respektive drejt BE-së”, shtoi ai.

Sipas Borrell, blloku evropian do të vëzhgojë zbatimin e këtyre zotimeve dhe nëse palët nuk e zbatojnë atë, do të kenë pasoja.

Ai shtoi se Kosova dhe Serbia do të përfitojnë nga kjo marrëveshje, por edhe rajoni, pasi sipas Borrell, kjo marrëveshje ka të bëjë me sigurinë dhe prosperitetin e gjithë rajonit.

23:03 18.3.2023

Vuçiq: Njëfarë marrëveshjeje është arritur

Presidenti i Serbisë, Aleksandar Vuçiq, tha se “njëfarë marrëveshjeje është arritur”.

“Jam i kënaqur për këtë, por nuk është e gjitha”, tha ai pas takimit me kryeministrin e Kosovës, Albin Kurti, në Ohër të Maqedonisë së Veriut.

Në këtë takim që u ndërmjetësua nga zyrtarë të Bashkimit Evropian, u bisedua për zbatimin e një propozimi të BE-së për normalizimin e marrëdhënieve Kosovë-Serbi.

Vuçiq tha se është rënë dakord për “disa afate” dhe se është rënë dakord që brenda 30 ditësh të formohet bashkërisht një komision monitorues, i cili do të kryesohet nga BE-ja, për monitorimin e zbatimit të marrëveshjes. Ai po ashtu tha se është rënë dakord që “menjëherë të nisë formimi i Asociacionit”.

Presidenti i Serbisë, Aleksandar Vuçiq. Ohër, 18 mars 2023.
Presidenti i Serbisë, Aleksandar Vuçiq. Ohër, 18 mars 2023.

Sipas Vuçiqit, do të hartohet edhe një deklaratë për të zhdukurit, ndërsa është planifikuar edhe një konferencë e donatorëve brenda pesë muajsh.

Duke iu drejtuar gazetarëve, ai tha se nuk ka nënshkruar asgjë.

“Këto disa pika për të cilat kemi rënë dakord, do të jenë pjesë e kornizës së negociatave për të dyja palët, si për Beogradin, ashtu edhe për Prishtinën. Këshilli Evropian do të marrë një vendim që kjo të bëhet pjesë e vendimit të negociuar”, tha presidenti serb.

Këshilli Evropian do të vlerësojë se sa është bërë nga plani i zbatimit, tha ai.

“Për ne është shumë e rëndësishme që formimi i Asociacionit të komunave me shumicë serbe [në Kosovë] është vendosur si detyrim me prioritet dhe atë në përputhje me marrëveshjet e arritura më parë, në kuadër të dialogut. Më duhet të them se jam shumë i kënaqur për këtë”.

Vuçiq tha se do t’i njoftojë qytetarët e Serbisë për gjithçka që ka ndodhur dhe do t’ua shpjegojë “atë që i pret”.

22:59 18.3.2023

Liderët e Kosovës dhe Serbisë, në qendrën mediale në Ohër

Kryeministri i Kosovës, Albin Kurti, dhe presidenti i Serbisë, Aleksandar Vuçiq, janë në qendrën mediale në Ohër.

Kurti tha shkurt për gazetarët se do të prononcohet pas deklaratës për media të përfaqësuesit të lartë të Bashkimit Evropian për politikë të jashtme dhe siguri, Josep Borrell.

Në Ohër të Maqedonisë së Veriut, për mbi dhjetë orë, delegacionet e Kosovës dhe Serbisë zhvilluan bisedime lidhur me planin e zbatimit të propozimit evropian për normalizimin e raporteve.

Këtë propozim, Kurti dhe Vuçiq e pranuan më 27 shkurt, gjatë rundit të dialogut të zhvilluar në Bruksel.

22:13 18.3.2023

Në qendrën mediale në Ohër edhe Gabriel Escobar

I dërguari i Shteteve të Bashkuara, Gabriel Escobar, ka qenë i pranishëm në takimet në Ohër në cilësinë e vëzhguesit.

Pas përfundimit të bisedimeve, ai është parë në hotelin ku është vendosur qendra mediale.

Zyrtari amerikan, Gabriel Escobar, në ambientet ku është vendosur qendra mediale në Ohër të Maqedonisë së Veriut.
Zyrtari amerikan, Gabriel Escobar, në ambientet ku është vendosur qendra mediale në Ohër të Maqedonisë së Veriut.

Escobar, i tha më herët gjatë ditës Radios Evropa e Lirë, se “nuk jemi të fokusuar te nënshkrimi, por te finalizimi i marrëveshjes”.

Ende nuk dihet nëse zyrtari i lartë amerikan do të prononcohet për mediat pas përfundimit të rundit të bisedimeve.

Shfaq më shumë

XS
SM
MD
LG