Ndërlidhjet

Pa kuorum në seancat e jashtëzakonshme


Kuvendi i Kosovës, 5 shtator

Përmbledhja

Të nderuar lexues,

Këtu po e përmbyllim mbulimin direkt të zhvillimeve në Kuvend.

Kuvendi nuk arriti që të miratojë ekipin negociator të propozuar nga Qeveria e Kosovës.

Po ashtu, seanca e jashtëzakonshme e thirrur nga opozita nuk arriti që të fillojë për mungesë kuorumi.

Informacionet e fundit nga Kosova, rajoni dhe bota, mund t'i ndiqni në faqen tonë të internetit, evropaelire.org.

Na ndiqni edhe në rrjetet sociale Facebook dhe Twitter dhe Instagram.

15:23 5.9.2018

Kuvendi nuk nis seancën në kohën e paraparë

Kuvendi i Kosovës nuk ka filluar seancën e paraparë për në orën 14:00, për të votuar ekipin negociator të emëruar nga Qeveria e Kosovës.

Zyrtarët e partive politike të kontaktuar nga Radio Evropa e Lirë, kanë thënë se ende janë në konsultime lidhur me mënyrën e vazhdimit të seancës.

Kuvendi i Kosovës, 5 shtator 2018
Kuvendi i Kosovës, 5 shtator 2018

20:49 4.9.2018

LDK: Seanca e sotme ishte maskaradë

Deputetët e Lidhjes Demokratike të Kosovës, me t’u shtyrë seanca e sotme e jashtëzakonshme për ekipin negociator, janë futur në sallën e Kuvendit ku kanë qëndruar për disa minuta. Më pas, janë paraqitur në hollin e Kuvendit, ku shefi i Grupit Parlamentar të LDK-së, Avdullah Hoti tha se “seanca e sotme ishte një maskaradë”.

Ai tha se Qeveria me këtë ekip negociator po bëhet pjesë e projektit të presidentit Hashim Thaçi, si tha ai, “për ndarjen e Kosovës”.

Avdullah Hoti, shef i Grupit Parlamentar të LDK-së
Avdullah Hoti, shef i Grupit Parlamentar të LDK-së

LDK me mbështetjen e dy partive tjera opozitare, kanë thirrur po ashtu seancë të jashtëzakonshme në të cilën është kërkuar miratimi i një rezolute kundër, siç është thënë, “angazhimeve të Presidentit të Kosovës për përfshirjen e ‘shkëmbimit të territoreve’ apo ‘korrigjim të kufijve’ në dialogun në mes të Kosovës dhe Serbisë”.

20:17 4.9.2018

Seanca për ekipin negociator vazhdon të mërkurën

Kuvendi i Kosovës nuk ka arritur sot që të procedojë me votimin për emërimin e ekipit negociator, për shkak të mungesës së kuorumit të nevojshëm.

“Seanca e jashtëzakonshme do të vazhdojë të mërkurën në orën 14:00”, tha kryetari i Kuvendit, Kadri Veseli.

Kryetari i Kuvendit, Kadri Veseli. Foto nga arkivi
Kryetari i Kuvendit, Kadri Veseli. Foto nga arkivi

Edhe pas një pauze të shpallur për 15 minuta, por që zgjati rreth nëntë orë, Kuvendi nuk procedoi me votimin. Debatet, pa praninë e opozitës në këtë seancë të jashtëzakonshme të thirrur nga Qeveria e Kosovës kanë zgjatur vetëm një orë.

Në bazë të propozimit të Qeverisë, në krye të ekipit do të jetë zëvendëskryeministri Fatmir Limaj. Kurse anëtarë të këtij ekipi janë edhe Behgjet Pacolli, Enver Hoxhaj, Avni Arifi, Dardan Gashi dhe Mahir Yagcilar. Po ashtu, edhe partitë opozitare janë ftuar që të dërgojnë përfaqësuesit e tyre në këtë ekip.

Emërimi i këtij ekipi kërkon 61 vota të deputetëve.

Opozita, ndërkaq, ka bojkotuar këtë seancë dhe ka thirrur një seancë tjetër të jashtëzakonshme përmes së cilës po kërkon miratimin e një rezolute kundër bisedimeve për ndryshimin e kufijve të Kosovës, sipas idesë së propozuar nga presidenti, Hashim Thaçi.


18:39 4.9.2018

Haradinaj: Mungesa e opozitës në seancë është gabim

Kryeministri i Kosovës, Ramush Haradinaj e quan të gabuar mosprezencën e partive opozitare, në seancën e jashtëzakonshme të thirrur nga Qeveria, për ekipin negociator në dialogun me Serbinë.

“Tani e kemi të vështirë të vlerësojmë se si do të veprojmë. Në fakt, ishte pak gabim kjo mosardhja e opozitës në seancën paraprake. Votimi i delegacionit të Qeverisë dhe të Kosovës ku ishte e parapraë edhe roli i opozitës, ose edhe dhënia e mendimit për këtë delegacion, do ta hapte një dialog pastaj që edhe pozita ta ketë mendimin e vet për rezolutën (e opozitës). Mosardhja fare në seancë na ka nxjerrë në pozitë të pafavorshme”, tha Haradinaj.

Kryeministri Haradinaj tha se më herët i kishte propozuar Parlamentit platformën për dialogun, por që sipas tij, nuk kishte mirëkuptim për të, duke shtuar se “tani i kam propozuar delegacionin, të shohim a do të kemi mirëkuptim”.

Seanca e thirrur nga Qeveria e Kosovës, ku pritet të miratohet ekipi negociator në dialogun me Serbinë ka nisur në orën 9:00. Ajo është ndërprerë në orën 11, dhe që atëherë, Kuvendi gjendet në pauzë.

Kryeministri i Kosovës, Ramush Haradinaj gjatë seancës së 4 shtatorit
Kryeministri i Kosovës, Ramush Haradinaj gjatë seancës së 4 shtatorit

Trego më shumë

Facebook Forum

XS
SM
MD
LG