Serbia nis hetime pas shembjes së strehës në Novi Sad që la 14 të vdekur

2 nëntor 2024

Ekipet e kërkim-shpëtimit duke tentuar të nxjerrin viktimat nga rrënojat.

Serbia ka nisur të shtunën hetime për shembjen e një strehe betoni mbi hyrjen e një stacioni hekurudhor në Novi Sad të Serbisë, që ka rezultuar me vrasjen e 14 personave.

Për shembjen është raportuar të premten, ndonëse moti ka qenë i mirë, me diell.

Ekipet e kërkim-shpëtimit kanë punuar përgjatë natës për t’i nxjerrë të vdekurit dhe të plagosurit nga rrënojat prej betoni.

Në stacionin në Novi Sad, qytet rreth 70 kilometra në veriperëndim të Beogradit, janë kryer punime për rinovim të tij.

Pasojat e tragjedisë në Novi Sad

1/10 Ngjarja ndodhi pasditen e 1 nëntorit në qytetin e dytë më të madh të Serbisë.

2/10 Dhjetëra punonjës të emergjencës, me vinça dhe ekskavatorë, u angazhuan në operacione të kërkim-shpëtimit.

3/10 Së paku tre persona të plagosur raportohet se janë në gjendje të rëndë. "Një djalë 18 vjeç dhe dy vajza 21 dhe 23 vjeçe janë plagosur rëndë dhe jeta e tyre është në rrezik", tha zëdhënësi i shërbimeve të urgjencës në Novi Sad, Zoran Krul.

4/10 Deri në orët e mbrëmjes më 1 nëntor u identifikuan 7 persona të vdekur - më i riu prej tyre i lindur në vitin 2004 dhe më i vjetri i lindur më 1979.

5/10 Hekurudhat e Serbisë thanë përmes një deklarate se pjesa e çatisë që u shemb, nuk ishte pjesë e rinovimit.

6/10 Kryeministri i Serbisë, Millosh Vuçeviq, u zotua se autoritetet do ta hetojnë shkakun e aksidentit. “Ne do të këmbëngulim derisa t'i gjejmë përgjegjësit, ata që duhej të garantonin për sigurinë e strukturës”, tha ai, duke shtuar se është “thellësisht i tronditur nga tragjedia”.

7/10 Me vendim të Qeverisë, 2 nëntori u shpall ditë zie në Serbi.

Presidenti i Serbisë, Aleksandar Vuçiq, tha se ka kërkuar nga Prokuroria e Lartë në Novi Sad dhe Qeveria e Serbisë që personat përgjegjës për atë që ka ndodhur, të ndiqen penalisht dhe të dënohen rëndë. — 8/10 Presidenti i Serbisë, Aleksandar Vuçiq, tha se ka kërkuar nga Prokuroria e Lartë në Novi Sad dhe Qeveria e Serbisë që personat përgjegjës për atë që ka ndodhur, të ndiqen penalisht dhe të dënohen rëndë.

9/10 Kërkim-shpëtimi po vazhdonte edhe në orët e mbrëmjes, pasi autoritetet thanë se nuk janë të sigurta nëse nën rrënoja nuk ka më njerëz.

10/10 Qytetarët e Novi Sadit ndezën qirinj pranë vendit ku ndodhi tragjedia.

Ministri i Transportit, Goran Vesiq ka thënë se hetimet që kanë nisur në Novi Sad, do të përfshijnë edhe Institutin shtetëror të Trafikut, kompani shtetërore për hekurudha, dhe një konsorcium kinez, që ka kryer punimet për renovim.

“Hetimet do të vërtetojnë kush i ka marrë vendimet dhe kush ka vënë nënshkrimet, kush ka qenë i angazhuar për të kontrolluar cilësinë e punimeve”, ka thënë Vesiq për televizionin shtetëror.

Vesiq, kompania shtetërore hekurudhore, Instituti shtetëror i Trafikut dhe konsorciumi kinez, kanë thënë se pjesa e shembur e ndërtesës nuk ka qenë pjesë e rinovimeve.

Ministri i Brendshëm serb, Ivica Daçiq ka thënë se 20 persona do të intervistohen të shtunën lidhur me këtë katastrofë, përfshirë zyrtarë të ministrisë që janë të ngarkuar për këto çështje.

“Do të sigurohet edhe dokumentacioni për ndërtesën… kush i ka marrë vendimet”, ka thënë Daçiq.

Autoritetet e kanë shpallur të shtunën ditë zie.

Njerëzit janë parë duke dërguar lule dhe duke ndezur qirinj afër zonës së incidentit.

Opozita serbe, e cila akuzon autoritetet besnike ndaj presidentit serb, Aleksandar Vuçiq, për korrupsion enorm dhe nepotizëm, ka bërë thirrje për protesta në Novi Sad, më vonë gjatë ditës.

Vuçiq, popullist, dhe aleatët e tij, hedhin poshtë këto pretendime.

Vetë Vuçiq është zotuar të premten se do të ketë drejtësi dhe ka kërkuar ndëshkime të ashpra për përgjegjësit.

Ndërlidhjet

Na ndiqni

Serbia nis hetime pas shembjes së strehës në Novi Sad që la 14 të vdekur

Pasojat e tragjedisë në Novi Sad