Ndërlidhjet

Gjashtë të vrarë dhe dhjetëra të plagosur nga sulmi në Turqi


Policia turke në vendin ku ndodhi sulmi në Stamboll më 13 nëntor.

Të paktën gjashtë persona janë vrarë dhe 81 janë plagosur nga shpërthimi në një zonë të frekuentuar në qendër të Stambollit, thanë autoritetet turke më 13 nëntor.

Sulmi ndodhi në orën 16:20, sipas kohës lokale, në një rrugë në zonën e Sheshit Taksim, tha guvernatori i Stambollit, Ali Yerlikaya.

Zëvendëspresidenti i Turqisë, Fuat Oktay, tha se besohet se shpërthimi është sulm terrorist, i kryer nga një grua.

Ndërkaq, presidenti i Turqisë, Recep Tayyip Erdogan, tha se keqbërësit do të ndëshkohen.

Duke folur në një konferencë për media në Stamboll, Erdogan dënoi sulmin “e poshtër” dhe tha se këtij sulmi po i “vjen era terror”.

“Mund të jem gabim nëse e them se jam i sigurt se ky është terror, por sipas shenjave të para.... ka një erë terrori në këtë ngjarje”, tha Erdogan gjatë një konference për media.

"Përpjekja për të sunduar Turqinë dhe popullin e Turqisë përmes terrorizmit nuk do të jetë e mundur të arrihet as sot, e as nesër", shtoi ai.

Sipas liderit turk, katër persona vdiqën në vendin e ngjarjes dhe dy në spital.

Në vendin ku ndodhi shpërthimi ka dyqane dhe restorante dhe në momentin e sulmit shumë persona ishin në atë rrugë.

Një grua, që ishte në një dyqan në rrugën Istiklal, tha se pas shpërthimit kishte kaos.

“Kam parë njerëz të plagosur që rrokulliseshin në rrugë”, tha ajo për BBC.

“Njerëzit filluan të vraponin në panik... Ka pasur tym të zi. Zhurma ishte e fortë, pothuajse shurdhuese”, tha një tjetër dëshmitar, Cemal Denizci, për agjencinë AFP.

Rruga Istiklal, ku ndodhi sulmi, edhe më herët kishte qenë cak i sulmeve vetëvrasëse me bomba më 2016.

Sipas agjencisë shtetërore të lajmeve, Anadolu, pesë prokurorë janë caktuar që ta hetojnë këtë ngjarje.

Zona ku ndodhi shpërthimi është evakuuar.

Pas shpërthimit në Stamboll, Ambasada e Kosovës në Ankara tha se nuk ka informacione se në mesin e të vrarëve dhe të plagosurve është ndonjë shtetas i Kosovës.

Kjo ambasadë ka vënë në dispozicion një numër kontaktues emergjent të Konsullatës në Stamboll për qytetarët e Kosovës që gjenden në shtetin e Turqisë.

"Për ata të cilët aktuaisht ndodhen në Stamboll, kërkojmë që të qëndroni vigjilentë dhe të ndiqni këshillat e autoriteteve lokale të sigurisë", thuhet në njoftim.

Ndërkaq, vëzhguesi i mediave në Turqi ka ndaluar përkohësisht raportimeve e mediave për shpërthimin, që do të thotë se transmetuesit nuk mund të shfaqin video të momentit të shpërthimit apo edhe të momenteve pasuese. Bordi Suprem i Radios dhe Televizionit kishte vendosur ndalesa të tilla edhe në të kaluarën pas sulmeve aksidenteve apo edhe për disa çështje politike.

Turqia ishte goditur nga një seri bombardimesh vdekjeprurëse edhe më 2015 dhe 2017, përgjegjësinë e të cilave e kishin marrë grupi militant Shteti Islamik dhe militantët kurdë. Nga këto sulme janë vrarë mbi 500 civilë dhe personel i sigurisë.

Turqia për një kohë të gjatë lufton kundër militantëve kurdë - apo Partisë së Punëtorëve të Kurdistanit, që njihet si organizatë terroriste nga Turqia, Shtetet e Bashkuara dhe Bashkimi Evropian.

XS
SM
MD
LG