Ndërlidhjet

Rusia kryen sulme masive me dronë në Kiev


Dëmet e shkaktuara nga sulmet me dronë në Kiev më 28 maj 2023.
Dëmet e shkaktuara nga sulmet me dronë në Kiev më 28 maj 2023.

Forcat ruse kanë shënjestruar Kievin me një valë të madhe të sulmeve ajrore mëngjesin e 28 majit, thanë zyrtarët ukrainas, duke e përshkruar si sulmin “më të madh” me dronë ndaj këtij qyteti që nga nisja e luftës.

Sulmet ajrore vijnë në kohën kur shënohet Dita e Kievit, apo 1.541-vjetori i themelimit të qytetit.

Sistemet e mbrojtjes ajrore të Ukrainës kanë rrëzuar të paktën 40 dronë, ndërkaq rrëzimi i tyre ka vrarë të paktën një person dhe plagosur dy të tjerë thanë zyrtarët.

Serhiy Popko, kreu i administratës ushtarake të Kievit, tha se Rusia ka përdorur dronët e prodhimit iranian, Shahed për të kryer sulmet në Kiev, që është qyteti më i populluar në Ukrainë me rreth 3 milionë banorë.

“Sot armiku vendosi të ‘uronte’ popullin e Kievit për Ditën e Kievit me ndihmën e dronëve të tij vdekjeprurës”, shkroi Popko në Telegram.

“Sulmi u krye përmes disa valëve dhe sirenat e alarmit zgjatën mbi pesë orë”, shtoi ai.

Pjesët e dronëve të shkatërruar nga mbrojtja ajrore ranë mbi një depo trekatëshe, duke shkaktuar zjarr dhe duke shkatërruar mbi 1.000 metër katror të kësaj ndërtese, tha kryetari i Kievit, Vitali Klitschko.

Zjarre janë shkaktuar në disa qarqe të Kievit duke shkaktuar dëme materiale.

Rusia ka intensifikuar sulmet me raketa dhe dronë në Ukrainë, duke shënestruar ndërtesa ushtarake dhe linja të furnizimeve.

Në sulmet e fundit, Moska ka përdorur dronët e ashtuquajtur kamikazë, por edhe raketa me rreze të gjatë veprimi dhe raketa balistike.

Sulmet e fundit vijnë në kohën kur po pritet që të nisë kundërofensiva ukrainase, që synon të largojë nga territori ukrainas forcat ruse, të cilat nisën pushtimin e Ukrainës në shkurt të vitit të kaluar.

XS
SM
MD
LG