Donald Trump ka siguruar 270 votat e nevojshme të Kolegjit Zgjedhor për të fituar zgjedhjet presidenciale të SHBA-së, duke mposhtur Kamala Harrisin, sipas disa raporteve të mediave amerikane, përfshirë Associated Press dhe CNN.
Me një fitore në Uiskonsin, Trump, ish-presidenti dhe kandidati i Partisë Republikane, kaloi 270 votat e nevojshme për ta siguruar fitoren në garën presidenciale kundër Harrisit, aktualisht zëvendëspresidenteve e Shteteve të Bashkuara dhe kandidate e Partisë Demokratike.
Më herët, Trump shpalli veten fitues përpara një grupi mbështetësish.
"Nuk do të pushoj derisa të kemi arritur një Amerikë të fortë, të sigurt dhe të begatë, që fëmijët tanë meritojnë dhe që ju meritojeni", iu drejtua ai turmës së entuziazmuar të mbështetësve në orët e para të mëngjesit të 6 nëntorit, në Floridë.
Në një goditje të mëtejshme për Demokratët, Partia Republikane gjithashtu mori kontrollin e Senatit.
“Amerika na ka dhënë një mandat të paprecedentë dhe të fuqishëm”, tha Trump para përkrahësve në Floridë.
Forcimi i republikanëve pritet të ketë pasoja të mëdha për luftën e Rusisë në Ukrainë, konfliktet në Lindjen e Mesme dhe çështje të tjera globale.
Përderisa Harris kishte thënë se do të vazhdonte politikën e presidentit Joe Biden për mbështetje ndaj Ukrainës dhe kishte shprehur qartë dëshirën e saj për t'i parë forcat ruse të mundura, Trump shpesh ka vënë në dyshim mbështetjen e SHBA-së për Kievin, duke thënë se Evropa duhet të mbajë barrën kryesore dhe gjithashtu ka lënë të pasigurt të ardhmen e NATO-s.
Harris nuk ka folur ende para përkrahësve të saj, të cilët janë mbledhur në universitetin e saj të dikurshëm, Hoëard University. Kryesuesi i fushatës së saj, Cedric Richmond, iu drejtua shkurt turmës pas mesnate, duke thënë se Harris do të fliste publikisht të mërkurën.
“Ne ende kemi vota për të numëruar”, tha ai.
Republikanët fituan një shumicë në Senatin e SHBA-së pasi rrëzuan ulëset demokrate në Virgjinia Perëndimore dhe Ohajo.
Asnjëra nga partitë nuk dukej të kishte një avantazh në luftën për kontrollin e Dhomës së Përfaqësuesve, ku aktualisht republikanët mbajnë një shumicë të ngushtë.
Votimet në SHBA përmes fotove
Trump hyri në Ditën e Zgjedhjeve me një shans 50-50 për ta rimarrë Shtëpinë e Bardhë, duke u rikthyer pas 6 janarit të vitit 2021, kur shumë analistë e shpallën karrierën e tij politike të mbaruar.
Atë ditë, një turmë përkrahësish të tij sulmoi Kongresin në një përpjekje për të përmbysur rezultatet e zgjedhjeve të vitit 2020.
Trump fitoi më shumë mbështetje nga hispanikët, votues tradicionalisht demokratë, dhe në mesin e familjeve me të ardhura të ulëta që kanë ndier rritjen e çmimeve që nga zgjedhjet e fundit presidenciale në vitin 2020, sipas sondazheve të Edison.
Trump fitoi 45% të votuesve hispanikë në të gjithë vendin, duke mbetur prapa Harrisit me 53%, por duke u rritur me 13 pikë përqindje nga viti 2020.
Rreth 31% e votuesve thanë se ekonomia ishte çështja kryesore për të cilën votonin, dhe ata votuan për Trumpin me një përqindje të lartë.