Ndërlidhjet

Në Kosovë arrijnë mbi gjysmë milioni vaksina


Fotografi ilustruese.

Kosova ka pranuar të hënën (6 shtator) 556.920 doza të vaksinës Pfizer kundër koronavirusit.

“Prej këtij kontigjenti, 503 100 doza janë pjesë e donacionit të SHBA për Kosovën, të cilat në Kosovë kanë arritur përmes mekanizmit COVAX, ndërsa 53.820 doza të tjera janë nga marrëveshja bilaterale për vaksina kundër COVID-19 midis Ministrisë së Shëndetësisë dhe kompanisë Pfizer”, thuhet në njoftim.

Departamenti i Shtetit në SHBA tha se kjo sasi e vaksinave do t'ia mundësojë Kosovës të mbrojë qytetarët e saj më shpejt.

"Një Kosovë e shëndetshme, e pavarur, është një partner më i fortë për Shtetet e Bashkuara", thuhet në deklaratën e Departamentit të Shtetit.

Autoritetet në Kosovë thonë se me arritjen e këtyre vaksinave, imunizimi në masë kundër kundër COVID-19 do të përshpejtohet “me qëllim të arritjes së objektivit të Qeverisë për vaksinimin e 60% të popullatës sipas Planit shtetëror të vaksinimit”.

Më 1 shtator, ministri i Shëndetësisë, Arben Vitia, pati njoftuar se 133,234 doza të vaksinës AstraZeneca kundër koronavirusit janë hequr nga përdorimi, për shkak të skadimit të afatit.

Vaksinat kanë qenë pjesë e një donacioni nga Norvegjia.

Numri i qytetarëve të Kosovës të vaksinuar me nga dy doza të vaksinës kundër koronavirusit ka arritur në 315.880.

Numri total i vaksinave të administruara është 934.956.

Autoritetet shëndetësore në Kosovë thanë të hënën (6 shtator) se janë regjistruar edhe 28 viktima të reja nga sëmundja COVID-19.

Ministria e Shëndetësisë në raportin ditor për situatën epidemiologjisë thotë se janë shënuar edhe 489 raste të reja të të infektuarve me koronavirus.

Më herët, Shërbimi Spitalor dhe Klinik Universitar i Kosovës (SHSKUK) njoftoi se tetëdhjetë e tre pacientë me koronavirus, të shtrirë në spitalet e Kosovës, janë në gjendje të rëndë. Një ditë më herët, numri i pacientëve në gjendje të rëndë ishte 87.

Në total, në spitalet e Kosovës janë 1,115 pacientë pozitivë me koronavirus.

“Ministria e Shëndetësisë u bën thirrje të gjithë qytetarëve të grup-moshës mbi 16 vjeçe sikurse edhe kategorisë së fëmijëve të moshës prej 12-15 vjeç me indikacione mjekësore që të vaksinohen. Ministria e Shëndetësisë u bën thirrje edhe grave shtatzëna që të vaksinohen sikurse edhe nënave gjidhënëse gjithashtu”, thuhet në njoftimin e Ministrisë.

XS
SM
MD
LG