Ndërlidhjet

Vdiq ish-senatori amerikan, Bob Dole


Senatori Bob Dole
Senatori Bob Dole

Ish-senatori amerikan, Bob Dole, vdiq të dielën në moshën 98-vjeçare, njoftoi familja e tij.

"Senatori Robert Joseph Dole vdiq në gjumë, mëngjesin e sotëm".

"Ai u ka shërbyer me besnikëri Shteteve të Bashkuara të Amerikës për 79 vjet”, tha familja e tij përmes një deklarate.

Në muajin shkurt të këtij viti, senatori Dole ka njoftuar se është diagnostikuar me kancer në mushkëri.

"Kam disa vështirësi përpara, por gjithashtu e di se iu bashkohem miliona amerikanëve që përballen me sfida të konsiderueshme shëndetësore", ka thënë atëbotë Dole.

Ai ka kaluar një çerek shekulli në Senatin amerikan, ku, për disa vite, ka shërbyer si udhëheqës i shumicës.

Në vitin 1996 ka qenë kandidat i Partisë Republikane për president të SHBA-së, por ka humbur kundrejt demokratit Bill Clinton.

Ai ka kërkuar nominimin presidencial të partisë së tij edhe në vitin 1980 dhe në vitin 1988, ndërsa ka qenë kandidat për zëvendëspresident në vitin 1976.

Në vitin 1990, Dole ka udhëhequr një delegacion të SHBA-së në Kosovë, ndërsa në gusht të vitit 2020, për nder të angazhimit të tij për Kosovën, busti i tij është ​vendosur në Prishtinë.

Inaugurohet busti i senatorit Bob Dole në Prishtinë
Ju lutem prisni

No media source currently available

0:00 0:01:45 0:00

Në atë kohë, përmes një video-mesazhi, Dole ka shprehur mirënjohjen për inaugurimin e bustit.

"Më vjen keq që nuk mund të jem me ju në inaugurimin e bustit, më kujton kohën e para 30 vjetëve. Tridhjetë vjet kemi punuar për të krijuar një shtet të fortë dhe shpresoj se do të vazhdoni të punoni për t'u bërë edhe më të fortë", ka thënë Dole.

Në një postim në Twitter, më 30 gusht të vitit 2020, Dole ka shkruar:

"Tridhjetë vjet më parë, unë dhe kolegët e mi kemi udhëtuar për herë të parë në Prishtinë. Askush nga ne nuk mund ta dinte se ky do të ishte fillimi i një rrugëtimi drejt pavarësisë për popullin e Kosovës".

Më 30 nëntor, Dole ka bërë postimin e fundit në Twitter për Kosovën, duke paralajmëruar një program të Institutit Dole për historinë e Kosovës.

"Zoti e bekoftë Amerikën dhe Zoti e bekoftë Kosovën", ka shkruar Dole.

Prsidentja e Kosovës, Vjosa Osmani, shprehu pikëllimin e saj për vdekjen e senatorit Dole, të cilin e përshkroi si "hero lufte, politikan të respektuar dhe mbështetës të lirisë në të gjithë botën".

"Në veçanti jemi mirënjohës që ai gjithmonë ka qëndruar pranë popullit të Kosovës në luftën tonë për pavarësi", shkroi Osmani në Twitter.

Kryeministri i Kosovës, Albin Kurti, përmes një postimi në Twitter tha se ish-senatori Dole ishte një "përkrahës krucial i lirisë së Kosovës", teksa i shprehu ngushëllime familjes Dole dhe popullit amerikan për ndarjen nga jeta të ish-senatorit, Bob Dole.

XS
SM
MD
LG