Nga arkivi i REL-it:
Serbët në barrikada nuk flasin për arsyet e bllokimit të rrugëve
Njerëzit në barrikadën në Rudarë - Komuna e Zveçanit - nuk duan të flasin publikisht për arsyet e bllokimit të rrugëve.
Me gjithë përpjekjet e gazetarëve të REL-it, ata nuk pranuan të deklarohen.
Ata janë të mbledhur në grupe të vogla dhe në mesin e tyre ka edhe gra.
Bëhet fjalë kryesisht për punonjës në institucionet serbe në veri.
Disa nga kamionët që kanë bllokuar rrugët, i përkasin kompanisë publike “Standard”, drejtor i së cilës është kryetari i Listës Serbe, Goran Rakiq.
Këta kamionë janë përdorur edhe në disa barrikada të mëhershme që kanë ngritur serbët në veri.
Borrell bën thirrje për shtensionimin e situatës
Kosova dhe Serbia duhet të shtensionojnë situatën, tha të hënën shefi i politikës së jashtme të BE-së, Josep Borrell.
“Ato duhet t’i kthehen dialogut, duhet ta kapërcejnë këtë tendencë për të luftuar në rrugë”, tha ai para një takimi të ministrave të Jashtëm të BE-së në Bruksel.
Kujtojmë se në veri të Kosovës - zonë e banuar me shumicë serbe - disa grupe serbësh vazhdojnë bllokimin e rrugëve për të tretën ditë me radhë.
Protestën e nxiti arrestimi i një ish-zyrtari serb të Policisë së Kosovës, të shtunën.
Dejan Pantiq u arrestua nën dyshimet për përfshirje në sulme kundër zyrtarëve të Komisionit Qendror të Zgjedhjeve në veri të Kosovës dhe atyre policorë.
Ekipi i REL-it ndodhet aktualisht në fshatin Rudarë të Komunës së Zveçanit, ku vazhdon bllokada e rrugëve nga disa serbë lokalë.