Shkollat nën sistemin serb nuk punojnë
Ekipi i Radios Evropa e Lirë në terren raporton se shkollat në veri të Kosovës, të cilat funksionojnë nën sistemin e Serbisë, nuk janë duke punuar as sot, për shkak të, siç thuhet, “situatës së sigurisë”.
Këto shkolla nuk punuan as të hënën.
Në Mitrovicën e Veriut janë mbyllur edhe objektet e hotelerisë.
Njësitet patrulluese të misionit të NATO-s, KFOR, dhe të misionit të BE-së, EULEX, janë të pranishme në terren, ndërsa Policia e Kosovës është e stacionuar kryesisht në Mëhallën multietnike të Boshnjakëve - Komuna e Mitrovicës së Veriut.
Stradner: Rusia me strategji të përshkallëzimit të konfliktit Kosovë-Serbi
Situata në veri të Kosovës, për dallim nga herët tjera, është më serioze dhe mund të përshkallëzohet për shkak të provokimeve shtesë, si nga Beogradi, ashtu edhe nga ndikimi rus, thotë Ivana Stradner, bashkëpunëtore shkencore në Fondacionin për Mbrojtjen e Demokracisë në Uashington.
Sipas saj, NATO-ja duhet të përdorë retorikën që do t’ia bëjë të ditur Serbisë dhe Rusisë se “nuk është lodër”.
Intervistën e plotë dhënë Radios Evropa e Lirë mund ta lexoni këtu.
Pamje nga fshati Rudarë
Korrespondentët e REL-it në terren sjellin disa fotografi nga fshati Rudarë, Komuna e Zveçanit, ku disa qytetarë duken duke qëndruar në rrugë pranë barrikadave.
Escobar takon përfaqësuesit e opozitës në Kosovë
I dërguari i posaçëm i SHBA-së për Ballkanin Perëndimor, Gabriel Escobar, takon sot në Prishtinë përfaqësues të partive opozitare.
Një ditë më herët, ai u prit nga presidentja e Kosovës, Vjosa Osmani, dhe kryeministri Albin Kurti.
Escobar nuk foli për media pas këtyre takimeve, por në një njoftim nga Zyra e Kryeministrit u tha se ata kanë diskutuar "për situatën aktuale dhe zhvillimet e fundit, veçanërisht në pjesën veriore të Republikë së Kosovës".
"U theksua se barrikadat në rrugë duhet të largohen menjëherë", u tha në njoftimin e Kryeministrisë.
Disa serbë lokalë, qysh më 10 dhjetor, kanë ngritur barrikada në veri të Kosovës, duke bllokuar rrugët që çojnë drejt pikave kufitare me Serbinë.
Kjo, pasi Policia e Kosovës ka arrestuar ish-policin serb, Dejan Pantiq, nën dyshimet për përfshirje në një sulm kundër zyrtarëve të Komisionit Qendror të Zgjedhjeve.
SHBA-ja ka kërkuar largimin e barrikadave dhe shtensionimin e situatës.