Zjarret vazhdojnë të përhapen në Los Anxhelos

9 janar 2025

Një shtëpi plazhi e përfshirë nga flakët në Malibu, Kaliforni. 8 janar 2025.

Zjarret që kanë shpërthyer përreth Los Anxhelosit janë përhapur edhe në Hollivud Hills. Kjo fatkeqësi natyrore ka shkaktuar vdekjen e së paku pesë personave dhe shkatërrimin e qindra shtëpive.

Më shumë se 100.000 persona janë urdhëruar që të evakuohen, përderisa erërat e fuqishme po pengojnë punën e zjarrfikësve për të shuar zjarret, por edhe po përhapin flakët.

“Kjo stuhi zjarri është një e madhe”, tha kryetarja e Los Anxhelosit, Karen Bass gjatë një konference për media.

Imazhe satelitore të realizuara nga Planet Labs PBC të zjarreve në Los Anxhelos të Kalifornisë më 8 janar 2025.

Një vatër e re zjarri ka shpërthyer në Hollivud Hills të mërkurën mbrëma, tha shefi i zjarrfikësve, Kristin Crowley, duke detyruar më shumë banorë që të evakuohen.

Në Los Anxhelos aktualisht janë të paktën gjashtë vatra aktive zjarri.

Katër nga to janë 0% nën kontroll, thanë zyrtarët shtetërorë, përfshirë vatra të zjarrit në krahun lindor dhe atë perëndimor të qytetit që po vazhdojnë të digjen.

Zjarri shkrumbon disa lagje në Los Anxhelos

1/12 Një zjarrfikës duke shuar zjarrin në Pasadena, Kaliforni, SHBA më 8 janar 2025. Kjo vatër zjarri shkatërroi 80 hektarë, thanë zyrtarët.

2/12 Flaka ngrihet lart gjatë një zjarri në perëndim të Los Anxhelosit, Kaliforni, 7 janar 2025.

3/12 Zjarri është përhapur me shpejtësi në Los Anxhelos, duke shkatërruar shtëpi. Në rrugë janë shkaktuar kolona të gjata ndërsa rreth 30.000 persona janë urdhëruar që të evakuohen, pasi shtëllunga të mëdha tymi kanë mbuluar shumicën e zonës metropolitane.

4/12 Një zjarrfikës gjatë përpjekjeve për ta shuar zjarrin në një shtëpi që po digjet në Los Anxhelos.

5/12 Ekipet e zjarrfikësve gjatë përpjekjeve për t'i shuar flakët në një objekt.

6/12 Një strukturë e djegur nga zjarri në Pasadena, Kaliforni.

7/12 Teksa zjarri po përhapet, zyrtarët kanë paralajmëruar se erërat do të vazhdojnë ta përkeqësojnë situatën, duke rritur shqetësimet se do të detyrohen që t'i evakuojnë banorët edhe nga lagje të tjera.

8/12 Para se zjarri të niste, Shërbimi Kombëtar amerikan i Motit, lëshoi një paralajmërim për kushte ekstreme të zjarrit për shumicën e territorit të Los Anxhelosit, duke parashikuar erëra nga 80 deri në 130 kilometra në orë.

9/12 Dëshmitarët kanë thënë janë djegur shtëpi e vetura, teksa njerëzit janë evakuuar.

10/12 “Jemi me fat që deri më tani nuk kemi raportime për të lënduar”, tha shefi i zjarrfikësve në Los Anxhelos, Kristin Crowley, duke shtuar se më shumë se 25.000 persona në 10.000 shtëpi janë të kërcënuar nga zjarri.

Një zjarfikëse shihet afër një shtëpie të kapluar nga zjarri. Për shkak të mungesës së reshjeve të shiut, kushtet atmosferike janë “shumë të këqija”, tha zyra në Los Anxhelos e Shërbimit Kombëtar të Motit. — 11/12 Një zjarfikëse shihet afër një shtëpie të kapluar nga zjarri. Për shkak të mungesës së reshjeve të shiut, kushtet atmosferike janë “shumë të këqija”, tha zyra në Los Anxhelos e Shërbimit Kombëtar të Motit.

12/12 Guvernatori Gavin Newsom, i cili ka shpallur gjendje të jashtëzakonshme, tha se ka dislokuar personel, zjarrfikës dhe avionë edhe në pjesë të tjera në jug të Kalifornisë për shkak të rrezikut se zjarri mund të përhapet edhe më gjerësisht në rajon.

Departamenti i zjarrfikësve në Los Anxhelos ka lëshuar urdhra për evakuimin e banorëve nga zona brenda Hollivud Bulevard në jug, në Mulholland Drive në veri, në autostradën 101 në lindje e deri në Lauren Kanion Bulevard në perëndim.

Brenda kësaj zone gjendet Teatri Dobly, ku mbahet ceremonia e çmimeve Oscar. Nominimet për Oscar, që ishin paraparë për javën e ardhshme, janë shtyrë për dy ditë për shkak të zjarrit, thanë organizatorët.

Në pjesën perëndimore të Los Anxhelosit, autoritetet thanë se janë djegur 6.406 hektarë dhe qindra struktura. Ndërkaq, në lindje janë djegur 4.289 hektarë, 1.000 struktura dhe janë vrarë të paktën pesë persona, thanë zyrtarët.

Tre persona, po ashtu, janë arrestuar për plaçkitje, sipas policisë.

Dëmet e shkaktuara nga zjarri dhe humbjet në ekonomi vlerësohet të jenë miliarda dollarë.

“Ne po përballemi me një fatkeqësi natyrore të përmasave historike”, tha drejtori i menaxhimit të emergjencave në Los Anxhelos, Kevin McGowan.

Edhe pse parashikuesit e motit kanë paraparë që fuqia e erërave do të bjerë, kushtet e rrezikshme atmosferike pritet të vazhdojnë deri të premten.

Pothuajse 300.000 shtëpi dhe biznese mbetën pa rrymë në Los Anxhelos të mërkurën, teksa shkollat janë të mbyllura.

Përmasa e zjarreve ka bërë që zjarrfikësit të përballen me vështirësi dhe të punojnë përtej kapaciteteve të tyre. Zjarrfikës nga gjashtë shtete të tjera janë nisur drejt Kalifornisë për të ndihmuar në shuarjen e zjarreve.

Zjarret në pjesën perëndimore të Los Anxhelosit.

Zjarrfikësit në Los Anxhelos kanë thënë se tani po përballen edhe me mungesë të ujit, teksa po vazhdojnë përpjekjet e tyre për shuarjen e vatrave të zjarrit.

Presidenti amerikan, Joe Biden, i ka shpallur zjarret fatkeqësi të madhe. Në ditët e tij të fundit si president i SHBA-së, ai ka anuluar një udhëtim për në Itali, në mënyrë që të përqendrohet në drejtimin e përgjigjes të institucioneve federale në shuarjen e zjarreve, tha Shtëpia e Bardhë.

Shkencëtarët kanë thënë se ndryshimet klimatike, të nxitura nga njeriu, po bëjnë që ngjarje të motit ekstrem të jenë më të shpeshta, më intensive dhe të zgjasin më shumë.

Ndërlidhjet

Na ndiqni

Zjarret vazhdojnë të përhapen në Los Anxhelos

Zjarri shkrumbon disa lagje në Los Anxhelos