Shkarkohet shefja e Shërbimit Informativ të Shqipërisë, po hetohet për "zbulim të sekreteve"

Drejtuesja e Shërbimit Informativ të Shtetit (SHISH) në Shqipëri, Vlora Hyseni, u vu nën arrest shtëpiak më 22 shtator, në kuadër të një hetimi të Strukturës së Posaçme Kundër Korrupsionit dhe Krimit të Organizuar (SPAK) të Shqipërisë për dosjen e Agjencisë Kombëtare të Shoqërisë së Informacionit (AKSHI).

Masa e arrestit shtëpiak ndaj Hysenit, ish-zyrtare e lartë e Agjencisë së Kosovës për Inteligjencë (AKI), u caktua nga Gjykata e Posaçme. Sipas SPAK-ut, ajo po hetohet për veprat penale “zbulimi i akteve ose të dhënave sekrete” dhe “përkrahja e autorit të krimit”.

Hyseni u shoqërua në banesën e saj në orët e mbrëmjes, disa orë pasi kryeministri shqiptar, Edi Rama, njoftoi se ajo ishte liruar nga detyra si drejtuese e SHISH-it. Shkarkimi u dekretua më pas nga presidenti i Shqipërisë, Bajram Begaj.

Policia shqiptare nuk ka bërë të ditur zyrtarisht rrethanat e ndalimit të saj. Sipas burimeve të cituara në media, Hyseni kishte hyrë në Shqipëri nga Kosova, përmes pikës kufitare të Morinës.

SPAK-u tha se hetimi ndaj Hysenit është pjesë e një hetimi më të gjerë për AKSHI-n, institucionin që administron dhe zhvillon infrastrukturën e teknologjisë së informacionit të Qeverisë shqiptare.

Në kuadër të këtij hetimi, Gjykata e Posaçme ka caktuar masa sigurie edhe ndaj personave të tjerë, përfshirë një punonjës të Institutit të Policisë Shkencore dhe një biznesmen.

SPAK-u njoftoi gjithashtu se, me urdhër të gjykatës, është kryer kontroll personal dhe kontroll në banesë ndaj një personi me inicialet I.P., të cilin e përshkroi si ish-funksionar të lartë të Policisë së Shtetit. Bëhet fjalë për ish-drejtorin e Policisë së Shtetit, Ilir Proda, i cili mëngjesin e 22 shtatorit u paraqit në SPAK.

Çfarë është hetimi për AKSHI-n?

Hetimi lidhet me dyshime për veprimtari kriminale dhe manipulim të procedurave të prokurimit publik. Në dosje janë përfshirë zyrtarë dhe biznesmenë, ndër ta biznesmeni Ergys Agasi dhe biznesmeni Ermal Beqiraj, i cili është arrestuar në Francë.

Agasi dyshohet për disa vepra penale, përfshirë konkurrencën e paligjshme përmes dhunës, heqjen e paligjshme të lirisë, shkeljen e barazisë së pjesëmarrësve në tenderë ose ankande publike, grupin e strukturuar kriminal dhe pastrimin e produkteve të veprës penale.

Në kuadër të hetimit, SPAK-u ka kërkuar sekuestrimin e 52 pasurive dhe llogarive bankare, me vlerë mbi 40 milionë euro. Sipas autoriteteve, pasuritë lidhen me disa prej personave nën hetim, përfshirë ish-drejtoreshën e AKSHI-t, Mirlinda Karçanaj, Agasin dhe Beqirajn.

SHIKONI EDHE:

Mes pasurive të sekuestruara janë banesa në Tiranë, Durrës dhe Vlorë, troje, sipërfaqe toke, llogari bankare dhe një jaht.

Karçanaj është vendosur në arrest shtëpiak, ndërsa zëvendësdrejtores së saj i është caktuar masa e detyrimit për paraqitje.

Hetimi i SPAK-ut është ende në zhvillim.

E kaluara e Hysenit në Kosovë

Para se të emërohej në krye të SHISH-it, Hyseni kishte mbajtur poste të larta në AKI. Ajo ishte zëvendësdrejtoreshë e këtij institucioni nga viti 2019 deri në qershor të vitit 2021, ndërsa më herët kishte drejtuar departamentin për Marrëdhënie me Jashtë.

Në qershor të vitit 2021, presidentja e Kosovës, Vjosa Osmani, dhe kryeministri Albin Kurti e shkarkuan Hysenin nga posti i zëvendësdrejtoreshës së AKI-së.

SHIKONI EDHE:

Qeveria e Kosovës nuk dha hollësi për arsyet e shkarkimit. Në komunikatën e atëhershme, ajo tha se vendimi ishte mbështetur në Ligjin për Agjencinë e Kosovës për Inteligjencë.

Në të njëjtën komunikatë përmendej se “zbulimi ose mosruajtja e informacioneve të klasifikuara” përbën vepër penale sipas legjislacionit në fuqi.

Në vitin 2023, Hyseni u emërua drejtuese e SHISH-it në Shqipëri. Para dekretimit të saj, opozita shqiptare i kërkoi presidentit Begaj të merrte informacione për arsyet e shkarkimit të saj nga AKI-ja.

Reagimet politike

Njoftimi për hetimin ndaj Hysenit ka nxitur reagime nga opozita shqiptare.

Deputetja e Partisë Demokratike në Shqipëri, Jorida Tabaku, kërkoi që presidenti Begaj të thërrasë Këshillin e Sigurisë Kombëtare, duke thënë se duhet të sqarohet nëse janë cenuar informacionet shtetërore, puna e institucioneve dhe siguria e qytetarëve.

Kreu i grupit parlamentar të Partisë Demokratike, Gazmend Bardhi, e lidhi aksionin e SPAK-ut me atë që ai e përshkroi si përfshirje të strukturave shtetërore në veprimtarinë e krimit të organizuar.

Hetimet dhe procedurat gjyqësore ndaj personave të përfshirë në dosjen e AKSHI-t vazhdojnë.